दस्तनोंदणीवर निर्बंध; कोंढवा परिसरातील तक्रारींच्या पार्श्वभूमीवर घरखरेदीदारांची फसवणूक रोखण्यासाठी कठोर अंमलबजावणीची गरज

राज्यातील अनधिकृत बांधकामे आणि मंजूर नकाशापेक्षा अधिक क्षेत्रफळ दाखवून सदनिकांची विक्री करणाऱ्या बांधकाम व्यावसायिकांना आळा घालण्यासाठी राज्य सरकारने महत्त्वाचे पाऊल उचलले आहे. सक्षम प्राधिकरणाची आवश्यक परवानगी न घेता उभारलेल्या इमारतींमधील फ्लॅटची विक्री तसेच मंजूर नकाशापेक्षा अधिक क्षेत्रफळाच्या सदनिकांच्या व्यवहारांना प्रतिबंध घालण्याच्या उद्देशाने महसूल विभागाने दस्तनोंदणीवर निर्बंध लागू केले आहेत. महसूलमंत्री चंद्रशेखर बावनकुळे यांनी या निर्णयामागील भूमिका स्पष्ट करताना नागरिकांची आर्थिक फसवणूक रोखणे हे सरकारचे प्रमुख उद्दिष्ट असल्याचे सांगितले

कोंढवा परिसरात अनधिकृत बांधकामांचा प्रश्न गंभीर…

पुणे शहरासह उपनगरांमध्ये, विशेषतः कोंढवा बु. आणि कोंढवा खुर्द परिसरात अनधिकृत बांधकामे करून नागरिकांना सदनिका विकल्या जात असल्याच्या तक्रारी समोर येत आहेत. काही बांधकाम व्यावसायिकांकडून मंजूर बांधकाम नकाशा, आवश्यक परवानग्या आणि इमारतीच्या कायदेशीर स्थितीबाबत ग्राहकांची दिशाभूल केली जात असल्याचा आरोप नागरिकांकडून करण्यात येत आहे.
या परिसरातील काही नागरिकांनी प्रशासनाच्या निदर्शनास अनधिकृत बांधकामांचे प्रकार आणून दिल्यानंतरही संबंधित बांधकामांवर प्रभावी कारवाई होत नसल्याची तक्रार आहे. त्यामुळे पुणे महानगरपालिकेच्या बांधकाम विभागाच्या कार्यपद्धतीवर प्रश्नचिन्ह उपस्थित होत असून, संबंधित बांधकाम व्यावसायिकांना अभय दिले जात आहे का, असा संशय नागरिकांकडून व्यक्त केला जात आहे. या आरोपांची अधिकृत चौकशी होणे आवश्यक आहे.

दस्तनोंदणीसाठी आवश्यक कागदपत्रांवर भर…

महसूलमंत्री चंद्रशेखर बावनकुळे यांच्या म्हणण्यानुसार, राज्यातील विविध शहरांच्या उपनगरी भागांत रहिवासी झोनशी संबंधित नियमांचे उल्लंघन, आवश्यक महारेरा नोंदणी न करणे आणि मंजूर क्षेत्रापेक्षा जास्त बांधकामाची विक्री करून ग्राहकांची आर्थिक फसवणूक होण्याचे प्रकार वाढले होते. या संदर्भात लोकप्रतिनिधींनी विधिमंडळातही तक्रारी मांडल्या होत्या.
या गैरप्रकारांना आळा घालण्यासाठी लागू करण्यात आलेल्या नियमांनुसार, महारेरा कायद्यानुसार नोंदणी आवश्यक असलेल्या प्रकल्पांतील सदनिकांच्या पहिल्या विक्रीसाठी संबंधित नोंदणी प्रमाणपत्र किंवा भोगवटा प्रमाणपत्र आणि मंजूर बांधकाम नकाशा सादर करण्याची अट नमूद करण्यात आली आहे.
तर, महारेरा नोंदणीची आवश्यकता नसलेल्या प्रकल्पांसाठी सक्षम प्राधिकरणाचे बांधकाम प्रारंभ प्रमाणपत्र, मंजूर नकाशा, झोन दाखला आणि मोजणी नकाशा यांसारखी आवश्यक कागदपत्रे सादर करावी लागतील, अशी माहिती देण्यात आली आहे. प्रत्यक्ष व्यवहारात कोणती कागदपत्रे बंधनकारक आहेत, हे संबंधित प्रकल्पाला लागू असलेल्या नियमांनुसार तपासणे आवश्यक आहे.
निर्णयाची प्रभावी अंमलबजावणी होणार का?
राज्य सरकारचा हा निर्णय ग्राहकांच्या हिताच्या दृष्टीने महत्त्वाचा मानला जात असला, तरी पुणे शहरातील आणि विशेषतः कोंढवा बु. व कोंढवा खुर्द परिसरातील अनधिकृत बांधकामांवर प्रत्यक्षात किती प्रभावी कारवाई होते, याकडे नागरिकांचे लक्ष लागले आहे.
महसूल विभागाच्या दस्तनोंदणीवरील निर्बंधांसोबतच पुणे महानगरपालिकेच्या बांधकाम विभागानेही अनधिकृत बांधकामांची तपासणी करून नियमांचे उल्लंघन करणाऱ्यांवर कायद्यानुसार कारवाई करणे आवश्यक आहे. तसेच मंजूर नकाशा, प्रत्यक्ष बांधकाम, आवश्यक परवानग्या आणि सदनिकांच्या विक्रीसाठी दाखवण्यात येणारे क्षेत्रफळ यांची पडताळणी होणे गरजेचे आहे.
“नागरिक विश्वासाने सदनिका खरेदी करतात; मात्र नंतर ती अनधिकृत असल्याचे निष्पन्न झाल्यास त्यांचे मोठे आर्थिक नुकसान होते. अशा गैरप्रकारांना कायमचा आळा घालण्यासाठी हा निर्णय घेण्यात आला आहे,”

अशी भूमिका महसूलमंत्री चंद्रशेखर बावनकुळे यांनी मांडली.
आता या निर्णयाची प्रभावी अंमलबजावणी करून अनधिकृत बांधकामे आणि सदनिका विक्रीतील कथित गैरप्रकारांवर आळा घातला जातो का, तसेच कोंढवा परिसरातील तक्रारींवर पुणे महानगरपालिका ठोस कारवाई करते का, हे पाहणे महत्त्वाचे ठरणार आहे.

The post अनधिकृत बांधकामे आणि अतिरिक्त क्षेत्रफळाच्या फ्लॅट विक्रीला राज्य सरकारचा लगाम… appeared first on Grahak Jagruti News .

पुणे महानगरपालिकेत वाहतूक नियंत्रणासाठी ट्रॅफिक वॉर्डन नियुक्त करण्याच्या प्रक्रियेत निविदा न काढता सुमारे १८ कोटी रुपयांचे काम देण्याच्या निर्णयावर प्रश्नचिन्ह निर्माण झाले आहे. या प्रकरणी ग्राहक हक्क संघर्ष समितीच्या वतीने मा. लोकायुक्त तसेच पुणे महानगरपालिका आयुक्तांकडे तक्रार दाखल करण्यात आली होती. तक्रारीनंतर महापालिका आयुक्त नवल किशोर राम यांनी संबंधित निविदा/कामाच्या प्रक्रियेला स्थगिती देत चौकशीचे निर्देश दिल्याचे समोर आले आहे.

गणेशोत्सवाच्या पार्श्वभूमीवर शहरातील वाहतूक नियंत्रणासाठी तातडीची बाब म्हणून महापालिकेच्या ‘ई-६३ क’ नियमाचा आधार घेत विना निविदा पद्धतीने ट्रॅफिक वॉर्डन उपलब्ध करून देण्याचा प्रस्ताव पुढे आला होता. त्यानुसार मे. जयशंकर असोसिएट्स या ठेकेदाराला सुमारे १८ कोटी रुपयांचे काम देण्याची प्रक्रिया करण्यात आल्याचे वृत्तात नमूद करण्यात आले होते.
मात्र, विना निविदा प्रक्रिया, मोठ्या आर्थिक रकमेचे काम आणि संबंधित ठेकेदाराची पूर्वीची कामगिरी याबाबत ग्राहक हक्क संघर्ष समितीने आक्षेप नोंदवत प्रशासनाकडे तक्रार केली. या तक्रारीत सार्वजनिक निधीच्या वापराबाबत पारदर्शकता, नियमांचे पालन आणि निविदा प्रक्रियेची आवश्यकता याबाबत प्रश्न उपस्थित करण्यात आले.
विशेष म्हणजे, संबंधित ठेकेदाराने यापूर्वी महापालिकेच्या आरोग्य विभागाला मनुष्यबळ पुरविल्याचे सांगितले जाते. त्या कामात त्रुटी आढळल्यानंतर संबंधित कंपनीला काळ्या यादीत टाकण्यात आले होते. त्यानंतर कंपनीला काळ्या यादीतून वगळण्यात आल्याची माहितीही समोर आली आहे. त्यामुळे पुन्हा महापालिकेचे कोट्यवधी रुपयांचे काम देण्याच्या प्रक्रियेबाबत अधिक पारदर्शक चौकशीची मागणी करण्यात आली.
दरम्यान, ग्राहक हक्क संघर्ष समितीच्या तक्रारीची दखल घेत महापालिका आयुक्त नवल किशोर राम यांनी संबंधित प्रक्रिया स्थगित केली असून, प्रकरणाची सखोल चौकशी करून लेखी अहवाल प्राप्त होईपर्यंत संबंधित ठेकेदाराकडून काम करून घेऊ नये, अशा सूचना दिल्याचे समोर आले आहे.
या निर्णयामुळे विना निविदा पद्धतीने करण्यात येत असलेल्या ट्रॅफिक वॉर्डन नियुक्ती प्रक्रियेला तूर्तास ब्रेक लागला आहे. त्यामुळे महापालिकेचा सुमारे १८ कोटी रुपयांचा संभाव्य खर्च स्थगित झाला असून, सार्वजनिक निधीच्या वापराबाबत पुढील चौकशीचा मार्ग मोकळा झाला आहे.
ग्राहक हक्क संघर्ष समितीच्या तक्रारीनंतर प्रशासनाने घेतलेल्या या निर्णयामुळे विना निविदा काम देण्याच्या प्रक्रियेबाबत आता चौकशीचा अहवाल काय निष्पन्न करतो, याकडे पुणेकरांचे लक्ष लागले आहे.

The post “१८ कोटींच्या विना निविदा व्यवहाराला ब्रेक! ग्राहक हक्क संघर्ष समितीच्या तक्रारीनंतर PMC आयुक्तांचा मोठा निर्णय” appeared first on Grahak Jagruti News .

पुणे शहरातील गणेशोत्सवाचा विसर्जन सोहळा अखेर तब्बल ३३ तास ३३ मिनिटांनंतर संपला. शनिवारी सायंकाळी सुमारे ६.१५ वाजता ‘महाराष्ट्र तरुण मंडळा’चा गणपती लकडी पुलाच्या दिशेने रवाना झाल्यानंतर यंदाच्या विसर्जन मिरवणुकीची सांगता झाली. मात्र, मानाच्या गणपतींच्या विसर्जनानंतरही लक्ष्मी रोड, कुमठेकर रस्ता, टिळक रोड यांसह शहरातील विविध मार्गांवर प्रमुख गणेश मंडळांच्या मिरवणुका संथ गतीने पुढे सरकत असल्याचे चित्र दिसून आले.

पुण्याच्या गणेश विसर्जन मिरवणुकीचे प्रमुख आकर्षण असलेल्या अलका टॉकीज चौकात शनिवारी सकाळपासून सायंकाळपर्यंत मोठी गर्दी पाहायला मिळाली. अनेक गणेश मंडळांच्या मिरवणुका उशिरापर्यंत सुरू राहिल्याने शहरातील प्रमुख रस्त्यांवर मोठ्या प्रमाणात गर्दी झाली होती.यंदाच्या विसर्जन मिरवणुकीपूर्वी मुंबई उच्च न्यायालयाने डीजे आणि लाऊडस्पीकरच्या वापराबाबत नियम घालून दिले होते. तसेच पुणे पोलिसांनीही मिरवणुका सुरक्षित आणि निर्धारित वेळेत पूर्ण करण्याच्या दृष्टीने गणेश मंडळांना विविध सूचना व आदेश दिले होते. मात्र, काही ठिकाणी या नियमांचे पालन झाले नसल्याचा आरोप होत असून, मिरवणुकांमध्ये मोठ्या आवाजातील डीजे, साऊंड सिस्टीम तसेच आक्षेपार्ह गाण्यांवर तरुणाई नाचताना दिसून आली.
शनिवारी सायंकाळी पाच वाजल्यानंतरही अलका टॉकीज चौक परिसरात काही गणेश मंडळांच्या डीजे आणि साऊंड सिस्टीमचा आवाज सुरू असल्याचे दिसून आले. त्यामुळे न्यायालयीन निर्देश आणि पोलिसांच्या आदेशांच्या अंमलबजावणीबाबत प्रश्न उपस्थित झाले.
दरम्यान, काही ठिकाणी बंदोबस्तावर असलेले पोलिस अधिकारी परिस्थितीवर लक्ष ठेवताना दिसले. सोशल मीडियावर तसेच प्रत्यक्ष मिरवणुकीदरम्यान नियमभंगाच्या घटनांबाबत नागरिकांकडून प्रश्न उपस्थित करण्यात आले.
विसर्जन मिरवणूक पूर्ण झाल्यानंतर पुणे पोलिस आयुक्त अमितेश कुमार यांनी पत्रकार परिषद घेतली. पुणेकर नागरिक, गणेश मंडळे आणि गणेशभक्तांनी विसर्जन सोहळा शांततेत पार पाडण्यासाठी सहकार्य केल्याबद्दल त्यांनी आभार मानले. भविष्यातही शहरातील कायदा व सुव्यवस्था राखण्यासाठी पुणेकरांचे सहकार्य मिळेल, अशी अपेक्षा त्यांनी व्यक्त केली.
विसर्जन मिरवणुका अतिशय चांगल्या पद्धतीने पार पडल्याचेही पोलिस आयुक्तांनी सांगितले. तसेच डीजे आणि लाऊडस्पीकरच्या वापराबाबत घालून दिलेल्या नियमांचे १०० गणेश मंडळांनी उल्लंघन केले, असे म्हणणे योग्य नसल्याचे त्यांनी स्पष्ट केले. मात्र, ज्या गणेश मंडळांकडून नियमांचे उल्लंघन झाले आहे, त्यांच्यावर कठोर कायदेशीर कारवाई करण्यात येईल, असा इशाराही त्यांनी दिला.
यंदाचा गणेशोत्सव पुणे शहरात मोठ्या उत्साहात आणि तुलनेने शांततेत पार पडला असला, तरी ३३ तास ३३ मिनिटे चाललेल्या विसर्जन मिरवणुकीमुळे वेळेचे नियोजन, ध्वनिप्रदूषण आणि नियमांची अंमलबजावणी हे मुद्दे पुन्हा एकदा चर्चेत आले आहेत.

The post पुणे शहरातील गणेशोत्सव निर्विघ्न पार; तब्बल ३३ तासांची विसर्जन मिरवणूक शांततेत संपन्न appeared first on Grahak Jagruti News .

गणेशोत्सवाच्या पार्श्वभूमीवर एरंडवणे परिसरात दरोडा टाकण्याच्या तयारीत असलेल्या पाच जणांना डेक्कन पोलिसांनी धारदार हत्यारे, लाल तिखटाची चटणी पावडर व इतर साहित्यांसह ताब्यात घेतले. पोलिसांच्या सतर्कतेमुळे दरोड्याचा संभाव्य प्रकार घडण्यापूर्वीच कारवाई करण्यात आली.
डेक्कन पोलीस ठाण्याचे अधिकारी व कर्मचारी गणेशोत्सवाच्या अनुषंगाने परिसरात पेट्रोलिंग करत असताना पोलीस अंमलदार सचिन गायकवाड यांना गोपनीय बातमीदारामार्फत माहिती मिळाली की, एरंडवणे येथील मित्र मंडळ (चावडी) परिसरातील गणेश मंदिराच्या इमारतीच्या मजल्यावर काही इसम धारदार हत्यारे, लाल तिखट व इतर साहित्य घेऊन दरोडा टाकण्याच्या तयारीत लपून बसले आहेत.

मिळालेल्या माहितीच्या आधारे डेक्कन पोलिसांचे अधिकारी व कर्मचारी घटनास्थळी गेले. एरंडवणे पुणे येथील एका दोन मजली इमारतीच्या वरील मजल्यावर पोलिसांनी पाहणी केली असता, दरवाजा उघडल्यानंतर तेथे पाच इसम आढळून आले. त्यांच्या जवळ तसेच टेबलवर धारदार हत्यारे, लाल रंगाची चटणी पावडर व इतर साहित्य आढळून आले.
या प्रकरणी डेक्कन पोलीस ठाण्यात गुन्हा रजिस्टर क्रमांक २७८/२०२६ नोंद करण्यात आला असून, भारतीय न्याय संहितेतील संबंधित कलमांसह शस्त्र कायदा कलम ४(२५) तसेच महाराष्ट्र पोलीस अधिनियम कलम ३७(१) सह १३५ अंतर्गत कारवाई करण्यात आली आहे.
अटक करण्यात आलेले आरोपी:-
रितेश गुरुनाथ चिप्पा (वय २५) — रा. गंजपेठ, महात्मा फुले वाड्यासमोर, समता भूमी, पुणे.
विकास नितीन लांबोर (वय १९) — रा. प्लॉट नं. १५, संजीवनी हॉस्पिटलजवळ, खिलारेवाडी, पुणे.
प्रतिक हनुमंत कांबळे (वय १९) — रा. सीडीएस कंपनीजवळ, गणेशनगर, चाळ नं. १०, एरंडवणे, अलंकार, पुणे.
प्रतिक रामचंद्र कदम ऊर्फ बाबू (वय २३) — रा. प्लॉट नं. १५, संजीवनी हॉस्पिटलजवळ, खिलारेवाडी, पुणे.
सुजल मनोज मोरे (वय १९) — रा. चाळ नं. ए/३/१८, खोली नं. २०, इंदिरानगर, बिबवेवाडी, पुणे.
वरिष्ठ अधिकाऱ्यांच्या मार्गदर्शनाखाली कारवाई
सदर कारवाई मा. अपर पोलीस आयुक्त, पश्चिम प्रादेशिक विभाग राजेश बन्सोडे, पोलीस उपायुक्त कृषिकेश रावळे, सहायक पोलीस आयुक्त अनूजा देशमाने यांच्या मार्गदर्शनाखाली करण्यात आली.
वरिष्ठ पोलीस निरीक्षक रुणाल मुल्ला, पोलीस निरीक्षक (गुन्हे) रणजितसिंह परदेशी, तसेच अधिकारी व कर्मचाऱ्यांच्या पथकाने ही कारवाई केली. तपास पथकात पोलीस उपनिरीक्षक योगेश मोरे, अजय भोसले, सहायक पोलीस फौजदार दत्तात्रय शिंदे, तसेच प्रशांत पवार, राजेंद्र मारणे, धनश्री सुपेकर, सचिन गायकवाड, सागर धाडगे, वसीम सिद्दीकी, धनाजी माळी आणि स्वप्निल गायकवाड यांचा सहभाग होता.

The post गणेशोत्सवाच्या पार्श्वभूमीवर एरंडवणेत दरोड्याच्या तयारीचा पर्दाफाश; धारदार शस्त्रांसह पाच जणांना अटक.. appeared first on Grahak Jagruti News .

बिबवेवाडी परिसरातील कथित गुरुवर्य, काळूबाईचा अवतार अडचणीत. सोलापूर येथील बांधकाम व्यावसायिक कौटुंबिक अडचणी आणि विविध पीडा दूर करण्याचे आमिष दाखवत एका बांधकाम व्यावसायिकाकडून ऑनलाइन पद्धतीने ४५ हजार रुपये घेतल्याप्रकरणी बिबवेवाडी परिसरातील मोनाली कृष्णा विधाते, तिचे पती कृष्णा विधाते आणि इतर साथीदारांविरोधात बिबवेवाडी पोलिस ठाण्यात फसवणूक तसेच महाराष्ट्र नरबळी आणि इतर अमानुष, अनिष्ट व अघोरी प्रथा आणि जादूटोणा प्रतिबंधक कायद्यान्वये गुन्हा दाखल करण्यात आला आहे. 

पोलिसांनी दिलेल्या माहितीनुसार, तक्रारदार हे सोलापूर जिल्ह्यातील टेंभुर्णी परिसरातील रहिवासी असून ते बांधकाम व्यवसाय करतात. सोशल मीडियावर त्यांनी ‘गुरुवर्य मोनाली आई विधाते’ या नावाने प्रसारित करण्यात आलेला व्हिडिओ पाहिला होता. या व्हिडिओच्या माध्यमातून कौटुंबिक अडचणी व पीडा दूर करण्याचे आश्वासन दिल्याचा आरोप आहे.
तक्रारदार डिसेंबर २०२५ मध्ये मोनाली विधातेच्या संपर्कात आले. त्यानंतर कथित पूजा-विधीसाठी हळदी-कुंकू, बाहुली आणि दोर पाठविण्यात आला आणि त्यासाठी ऑनलाइन पैसे पाठविण्यास सांगितल्याचे फिर्यादीत नमूद करण्यात आले आहे.
मात्र, त्यानंतरही कौटुंबिक अडचणी दूर न झाल्याने तक्रारदाराला बिबवेवाडीतील सुखसागारनगर परिसरातील घरी बोलावण्यात आले. तेथेही अडचणी दूर करण्याचे आमिष दाखविण्यात आले. तसेच तक्रारदाराला मृत्यूची भीती दाखवून ऑनलाइन स्वरूपात ४५ हजार रुपये घेतल्याचा आरोप फिर्यादीत करण्यात आला आहे.

‘काळूबाईचा अवतार’ असल्याचा कथित दावा…

मोनाली विधाते स्वतःला काळूबाईचा अवतार समजत असल्याचे तसेच गुरुवर्य म्हणून अनुयायांवर प्रभाव निर्माण करत असल्याचे तक्रारीत नमूद करण्यात आले आहे. सोशल मीडियावर तिचे विविध व्हिडिओ प्रसारित झाले असून, त्यामध्ये कथित धार्मिक व अघोरी स्वरूपाच्या पूजा-विधींचे प्रकार दिसून येत असल्याचा दावा करण्यात आला आहे. काही व्हिडिओंमध्ये मोठ्या प्रमाणात सोन्याचे दागिने परिधान करून पूजा-विधी करत असल्याचेही दिसते.
या प्रकारातून अनेक नागरिकांची फसवणूक झाली असण्याची शक्यता असून, भीतीपोटी काही नागरिक तक्रार करण्यासाठी पुढे येत नसल्याचा दावा करण्यात येत आहे. त्यामुळे या प्रकरणाचा सखोल तपास करून यामागील संपूर्ण आर्थिक व सामाजिक साखळी उघड करण्याची मागणी होत आहे.

मोनालीसह पाच जणांविरोधात गुन्हा..

या प्रकरणात मोनाली विधाते, तिचे पती कृष्णा विधाते (दोघे रा. सुखसागारनगर, कात्रज), मोनालीचा भाऊ मयूर, अशोक बनकर आणि मंजू कौर यांच्याविरोधात गुन्हा दाखल करण्यात आला आहे.
दरम्यान, सोशल मीडिया आणि यूट्यूबवर मोनाली विधातेविरोधात विविध बातम्या व आरोप प्रसारित होत असल्याचेही समोर आले आहे. तसेच तिच्याविरोधात PITA कायद्यान्वये गुन्हा दाखल असल्याचे काही सोशल मीडिया वृत्तांमध्ये नमूद करण्यात येत असल्याचा दावा करण्यात येत आहे. या दाव्याची अधिकृत नोंद व पोलिसांकडून स्वतंत्रपणे पडताळणी होणे आवश्यक आहे.
धमकी दिल्याचाही आरोप
तक्रारदाराला जिवे मारण्याची तसेच मारहाण करण्याची धमकी देण्यात आल्याचेही फिर्यादीत नमूद आहे. मोनाली विधाते आणि तिच्या साथीदारांनी अशाच पद्धतीने आणखी नागरिकांची फसवणूक केली आहे का, याचा तपास पोलिसांकडून करण्यात येत आहे.
या प्रकरणाचा पुढील तपास वरिष्ठ पोलिस निरीक्षक अश्विनी सातपुते यांच्या मार्गदर्शनाखाली सुरू आहे.
टीप : वरील प्रकरणातील आरोप हे तक्रारदाराच्या फिर्यादीवर आणि पोलिसांनी दिलेल्या माहितीनुसार मांडण्यात आले आहेत. आरोप सिद्ध होईपर्यंत संबंधित व्यक्तींना दोषी ठरविणे योग्य ठरणार नाही. प्रकरणाचा अंतिम निर्णय न्यायालयीन प्रक्रियेनंतर होईल.

The post काळूबाईचा अवतार असल्याचा दावा; ‘अघोरी’ पूजा करून ४५ हजारांची फसवणूक? बिबवेवाडीत मोनाली विधातेविरोधात गुन्हा appeared first on Grahak Jagruti News .

पुणे : माजी राज्यमंत्री तथा भाजपचे माजी आमदार दिलीप कांबळे यांच्या दोन चारचाकी वाहनांची अज्ञात व्यक्तींनी तोडफोड केल्याची धक्कादायक घटना बुधवारी रात्री घोरपडी परिसरात घडली. कांबळे यांच्या घराबाहेरच हा प्रकार घडल्याने पुण्यातील राजकीय वर्तुळात खळबळ उडाली आहे.

माजी आमदार दिलीप कांबळे यांनी दिलेल्या माहितीनुसार, बुधवारी रात्री आठ ते नऊच्या दरम्यान ते कुटुंबीयांसह बाहेर गेले होते. ते घरी परतल्यानंतर घराबाहेर उभ्या असलेल्या त्यांच्या दोन वाहनांची तोडफोड झाल्याचे त्यांच्या निदर्शनास आले. हल्लेखोरांनी दगड आणि बांबूच्या साहाय्याने वाहनांचे नुकसान केल्याचे सांगण्यात आले आहे.
विशेष म्हणजे, कांबळे राहत असलेल्या परिसरातील तीन सीसीटीव्ही कॅमेऱ्यांच्या वायरही तोडण्यात आल्याचे समोर आले आहे. तसेच, संबंधित सोसायटीमध्ये इतर वाहने असतानाही केवळ कांबळे यांच्या दोन वाहनांनाच लक्ष्य करण्यात आल्याची माहिती आहे.
या घटनेबाबत कांबळे यांनी मुंढवा पोलीस ठाण्यात तक्रार दिली असून, पोलिसांकडून अज्ञात हल्लेखोरांचा शोध सुरू आहे. सीसीटीव्ही यंत्रणांचे नुकसान करण्यात आल्याने पोलिस तपासात हल्लेखोरांची ओळख पटविणे हे महत्त्वाचे ठरणार आहे.
“घरासमोर उभ्या असलेल्या माझ्या गाड्यांची तोडफोड म्हणजे माझ्यावर आणि माझ्या घरावर झालेला हल्ला आहे,” अशी प्रतिक्रिया दिलीप कांबळे यांनी दिली.
घोरपडी येथील बी. टी. कवडे रस्त्यावरील सिटाडेल एम्प्रेस सोसायटी परिसरात ही घटना घडली. कांबळे हे 2014 ते 2019 या कालावधीत 13व्या महाराष्ट्र विधानसभेत पुणे कॅन्टोन्मेंट मतदारसंघाचे भाजपचे आमदार होते.
भाजपच्या माजी आमदाराच्या घराबाहेरच दोन वाहनांची तोडफोड झाल्याने या घटनेमागे नेमका उद्देश काय होता, हल्लेखोर कोण होते आणि हा पूर्वनियोजित प्रकार होता का, याबाबत आता पोलिस तपासातून काय समोर येते याकडे राजकीय वर्तुळासह नागरिकांचे लक्ष लागले आहे.

The post भाजपच्या माजी आमदाराला लक्ष्य? घराबाहेर दोन गाड्यांची तोडफोड; हल्लेखोर पसार appeared first on Grahak Jagruti News .

मार्केट यार्ड पोलीस ठाण्याच्या हद्दीतील आंबेडकर नगर, गल्ली क्रमांक ३ येथे २१ ऑगस्ट २०२६ रोजी रात्री सुमारे ११.४० वाजता सतिश गुलाब शिरसाट (वय २५) या तरुणावर जीवघेणा हल्ला झाला. या घटनेत त्याचा दुर्दैवी मृत्यू झाला असून, याप्रकरणी मार्केट यार्ड पोलीस ठाण्यात FIR क्र. ०१६३/२०२६ दाखल करण्यात आला आहे. या घटनेनंतर परिसरात भीतीचे वातावरण निर्माण झाले असून, मृत तरुण आणि संशयित आरोपी अंकुश साठे व त्यांच्या कुटुंबीयांमध्ये यापूर्वीपासून वाद असल्याची माहिती पोलिसांच्या निदर्शनास आणून देण्यात आली होती का? असा गंभीर सवाल स्थानिक नागरिकांकडून उपस्थित केला जात आहे.

स्थानिक नागरिकांच्या म्हणण्यानुसार, संबंधित वादांच्या पार्श्वभूमीवर यापूर्वी पोलीस ठाण्यात अर्ज अथवा NC स्वरूपात तक्रारी करण्यात आल्या असल्याचे सांगितले जात आहे. त्यामुळे या तक्रारींवर संबंधित पोलिसांनी नेमकी कोणती कार्यवाही केली, याची चौकशी करण्याची मागणी जोर धरत आहे.
तक्रारी होत्या तर प्रतिबंधात्मक कारवाई का झाली नाही?
वाद, धमक्या किंवा संभाव्य हिंसाचाराची माहिती पोलिसांना पूर्वीपासून मिळाली होती, असे तपासात निष्पन्न झाल्यास, कायद्यानुसार उपलब्ध प्रतिबंधात्मक उपाययोजना करण्यात आल्या होत्या का, हा या प्रकरणातील महत्त्वाचा प्रश्न ठरतो.
तसेच पूर्वी प्राप्त झालेल्या अर्जांची नोंद, NC असल्यास त्यावरील कार्यवाही, स्टेशन डायरीतील नोंदी, संबंधित अधिकाऱ्यांनी केलेली चौकशी आणि प्रतिबंधात्मक कारवाईसंदर्भातील कागदपत्रांची सक्षम स्तरावर तपासणी होणे आवश्यक असल्याचे नागरिकांचे म्हणणे आहे.
“फक्त आरोपीला अटक करून प्रकरण संपवू नये”           “एका तरुणाचा जीव गेल्यानंतर केवळ आरोपीवर कारवाई करून प्रकरण संपवू नये. घटना घडण्यापूर्वी पोलिसांच्या निदर्शनास काय माहिती होती आणि त्या माहितीच्या आधारे कोणती कार्यवाही करण्यात आली, याचे सत्य जनतेसमोर आले पाहिजे,” अशी मागणी स्थानिक नागरिकांनी केली आहे.
निष्पक्ष चौकशीची नागरिकांची मागणी
या संपूर्ण प्रकरणात पूर्वीच्या तक्रारी हाताळणारे संबंधित तपास अधिकारी तसेच वरिष्ठ अधिकाऱ्यांच्या भूमिकेची निष्पक्ष चौकशी करण्यात यावी. कर्तव्यात कसूर झाल्याचे चौकशीत आढळल्यास संबंधितांवर नियमानुसार कठोर प्रशासकीय कारवाई करण्यात यावी, अशी मागणी करण्यात आली आहे.
याशिवाय परिसरातील नागरिकांच्या सुरक्षिततेसाठी आवश्यक उपाययोजना करून, संपूर्ण प्रकरणाच्या तपासात पारदर्शकता ठेवावी, अशीही मागणी नागरिकांकडून करण्यात आली आहे.
महत्त्वाचे : जुन्या तक्रारी, पोलिसांना पूर्वकल्पना आणि प्रतिबंधात्मक कारवाईबाबतचे आरोप हे अधिकृत चौकशीतून पडताळणे आवश्यक आहे. त्यामुळे संबंधित अधिकाऱ्यांची भूमिका दोषी असल्याचे निष्कर्ष चौकशीपूर्वी काढू नयेत.

निष्पक्ष तपास • कायद्याचे राज्य • नागरिकांच्या सुरक्षिततेची हमी आहे का असा सवाल परिसरातील नागरिक, प्रसारमाध्यम समन्वयक / स्थानिक नागरिक कृती समिती, मार्केट यार्ड, पुणे

The post मार्केटयार्ड परिसरात हत्याकांड; “वेळीच कारवाई झाली असती तर जीव वाचला असता… appeared first on Grahak Jagruti News .

हडपसरमध्ये संतप्त नागरिकांचा निषेध; धार्मिक तेढ निर्माण करण्याचा प्रयत्न असल्याचा संशय — पोलिस तपासाची मागणी….

पुण्यातील हडपसर परिसरातील ससाणेनगर येथे छत्रपती शिवाजी महाराजांच्या पुतळ्यावर एका महिलेने चप्पल फेकल्याच्या घटनेने शहरात तीव्र संतापाची लाट उसळली आहे. या घटनेचा विविध सामाजिक संघटना व नागरिकांनी तीव्र निषेध नोंदविला असून, दोषी व्यक्तीवर कठोर कारवाई करण्याची मागणी करण्यात येत आहे.

ऐतिहासिकदृष्ट्या पुणे परिसराला छत्रपती शिवाजी महाराज आणि राजमाता जिजाऊ यांच्या कार्याची मोठी परंपरा लाभली आहे. पुणे परिसरात दुष्काळ, रोगराई आणि अस्थिरतेचे संकट असताना जिजाऊ माँसाहेब आणि बाल शिवाजी महाराजांनी पुण्याच्या पुनरुज्जीवनासाठी प्रयत्न केले. पुण्याच्या भूमीवर ‘सोन्याचा नांगर’ फिरविल्याची ऐतिहासिक परंपरा आजही लोकभावनेत जिवंत आहे.
अशा ऐतिहासिक वारशाच्या पुण्यात छत्रपती शिवाजी महाराजांच्या पुतळ्यावर चप्पल फेकण्याची घटना घडल्याने शिवप्रेमी नागरिकांमध्ये तीव्र नाराजी व्यक्त होत आहे.
प्रत्यक्षदर्शींच्या म्हणण्यानुसार, संबंधित महिलेने पायातील चप्पल काढून पुतळ्याच्या दिशेने ती फेकली. घटनेनंतर परिसरात नागरिक मोठ्या संख्येने जमा झाले. पोलिसांनी घटनास्थळी दाखल होत संबंधित महिलेला ताब्यात घेतले असून, पुढील कायदेशीर कारवाई सुरू असल्याची माहिती आहे.
दरम्यान, या घटनेमागे कोणाचा सहभाग आहे का, संबंधित महिलेने हे कृत्य स्वतःहून केले की तिला कोणी प्रवृत्त केले, तसेच या घटनेमागे सामाजिक किंवा धार्मिक तेढ निर्माण करण्याचा कोणताही हेतू होता का, याचा सखोल तपास करण्यात यावा, अशी मागणी सामाजिक कार्यकर्ते आणि नागरिकांकडून होत आहे.
‘मानसिक आजार’ असल्याचे कारण देऊन प्रकरण दडपले जाऊ नये; मात्र त्याबाबत अधिकृत वैद्यकीय व पोलिस तपासातूनच सत्य समोर यावे, अशीही नागरिकांची भूमिका आहे.
या घटनेच्या पार्श्वभूमीवर पुणे शहरातील विविध संघटनांकडून तीव्र निषेध व्यक्त करण्यात येत असून, शहर बंदची हाक देण्याबाबतही चर्चा सुरू असल्याचे सांगण्यात येत आहे.
दरम्यान, या घटनेवर विविध राजकीय नेते आणि सामाजिक नेते काय भूमिका घेतात, याकडे पुणेकरांचे लक्ष लागले आहे.
या संपूर्ण प्रकरणामागे नेमके कारण काय? कोणाचा हात आहे का? धार्मिक तेढ निर्माण करण्याचा प्रयत्न झाला का? या सर्व प्रश्नांची उत्तरे पोलिसांच्या निष्पक्ष तपासातूनच स्पष्ट होणार आहेत.

शिवरायांचा अवमान सहन केला जाणार नाही; पण सामाजिक शांतताही अबाधित राहिली पाहिजे!

The post छत्रपती शिवरायांच्या पुतळ्यावर चप्पल फेकल्याने पुण्यात संतापाचा उद्रेक! appeared first on Grahak Jagruti News .

जकराया शुगर लिमिटेड, वटवटे (ता. मोहोळ, जि. सोलापूर) येथून होत असल्याचा आरोप असलेल्या घातक रासायनिक सांडपाण्याच्या बेकायदेशीर विल्हेवाटीप्रकरणी तसेच निकृष्ट दर्जाच्या बायो-सीएनजीमुळे वाहनधारकांची आर्थिक फसवणूक होत असल्याच्या आरोपांवर तातडीने उच्चस्तरीय चौकशी करून कठोर कारवाई करावी, या मागणीसाठी ग्राहक हक्क संघर्ष समिती (महाराष्ट्र राज्य) चे संस्थापक अध्यक्ष श्री. मिलिंद मधुकर राजहंस यांनी आज, शुक्रवार दि. ७ ऑगस्ट २०२६ पासून पुणे विभागीय आयुक्त कार्यालयासमोर बेमुदत धरणे आंदोलन सुरू केले..

समितीच्या म्हणण्यानुसार, दिनांक ३० जून २०२६ रोजी विभागीय आयुक्त कार्यालयात सविस्तर तक्रार निवेदन सादर करूनही त्यावर कोणतीही ठोस दखल किंवा चौकशीचे आदेश देण्यात आले नाहीत. त्यामुळे प्रशासनाच्या निष्क्रिय भूमिकेविरोधात आंदोलनाचा मार्ग स्वीकारण्यात आल्याचे त्यांनी स्पष्ट केले.
तक्रारीमध्ये जकराया शुगर लिमिटेडकडून पेंट वॉशयुक्त, दुर्गंधीयुक्त आणि रासायनिक मिश्रित सांडपाणी टँकरद्वारे शेतजमिनी, माळराने व सार्वजनिक ठिकाणी टाकले जात असल्याचा आरोप करण्यात आला आहे. यामुळे शेतीची सुपीकता कमी होणे, पिकांचे नुकसान, भूजल प्रदूषण, जनावरांच्या आरोग्यावर परिणाम आणि नागरिकांच्या आरोग्यास धोका निर्माण होत असल्याचा दावा करण्यात आला आहे.
याशिवाय, आयएमसी लिमिटेड व जकराया शुगर लिमिटेड यांच्या संयुक्त विद्यमाने विक्री होत असलेल्या बायो-सीएनजीच्या गुणवत्तेबाबतही गंभीर प्रश्न उपस्थित करण्यात आले आहेत. निकृष्ट दर्जाच्या इंधनामुळे वाहनांचे मायलेज कमी होणे, इंजिनचे नुकसान होणे आणि ग्राहकांची आर्थिक फसवणूक होत असल्याचा आरोप करण्यात आला असून, एनएबीएल मान्यताप्राप्त स्वतंत्र प्रयोगशाळेमार्फत नमुन्यांची तपासणी करण्याची मागणी करण्यात आली आहे.
समितीने या संपूर्ण प्रकरणात संबंधित व्यवस्थापन, अधिकारी आणि संबंधित व्यक्तींची निष्पक्ष चौकशी करून पर्यावरण संरक्षण अधिनियम, जल व वायू प्रदूषण प्रतिबंधक कायदे, भारतीय न्याय संहिता, ग्राहक संरक्षण अधिनियम तसेच इतर लागू कायद्यांनुसार कठोर कारवाई करण्याची मागणी केली आहे.
तसेच, चौकशी पूर्ण होईपर्यंत संबंधित सांडपाणी प्रकल्प आणि बायो-सीएनजी प्रकल्प तात्काळ बंद करावेत, प्रभावित शेतकरी, नागरिक आणि वाहनधारकांना नुकसानभरपाई द्यावी तसेच यापूर्वी प्राप्त झालेल्या सर्व तक्रारी व अहवालांची पुनर्चौकशी करावी, अशीही मागणी करण्यात आली आहे.
समितीने स्पष्ट इशारा दिला आहे की, सक्षम चौकशीचे आदेश दिले जात नाहीत आणि दोषींवर कारवाई होत नाही तोपर्यंत हे बेमुदत धरणे आंदोलन सुरू राहील. तसेच आंदोलन दडपण्याचा किंवा थांबवण्याचा कोणताही प्रयत्न झाल्यास त्याची जबाबदारी संबंधित कंपनीच्या व्यवस्थापनावर आणि कंपनीला पाठीशी घालणाऱ्या संबंधित प्रशासकीय अधिकाऱ्यांवर राहील, असा इशाराही आंदोलनकर्त्यांनी दिला आहे…

The post जकराया शुगरविरोधात ग्राहक हक्क संघर्ष समितीचे बेमुदत आंदोलन.. appeared first on Grahak Jagruti News .

सोलापूर जिल्ह्यातील जकराया साखर कारखान्याच्या परिसरातील शेतजमिनींवर कारखान्यातील कथित प्रदूषित पाणी सोडून शेतजमिनी नापिक केल्या जात असून, विहिरी व बोअरवेलमधील पिण्याचे पाणीही दूषित होत असल्याचा गंभीर आरोप करण्यात आला आहे. तसेच संबंधित पेट्रोल पंपावर शासनाची फसवणूक करून सर्वसामान्य ग्राहकांची आर्थिक लूट होत असल्याचाही आरोप करण्यात आला आहे.

या संदर्भात राज्य शासन, महाराष्ट्र प्रदूषण नियंत्रण मंडळ, साखर आयुक्त तसेच संबंधित विभागांकडे वारंवार पुराव्यासह तक्रारी करूनही संबंधित कारखान्यावर कोणतीही प्रभावी कारवाई होत नसल्याचा आरोप ग्राहक हक्क संघर्ष समितीने केला आहे.
या प्रकरणाची स्वतंत्र विशेष समितीमार्फत सखोल चौकशी करून संबंधित संचालकांवर कठोर दंडात्मक कारवाई करण्यात यावी, या प्रमुख मागणीसाठी शुक्रवार, दि. ७ ऑगस्ट २०२६ पासून पुणे येथील विधानभवनासमोरील विभागीय आयुक्त कार्यालयासमोर बेमुदत धरणे आंदोलन करण्यात येणार असल्याची माहिती समितीचे अध्यक्ष मिलिंद मधुकर राजहंस यांनी दिली.
या आंदोलनासाठी विभागीय आयुक्त, पुणे विभाग यांच्याकडे परवानगी मिळावी यासाठी निवेदन सादर करण्यात आले असून, यापूर्वी दि. ३० जून २०२६ रोजी विभागीय आयुक्त, विविध मंत्री आणि संबंधित प्रशासकीय विभागांना तक्रार निवेदन देण्यात आल्याचेही त्यांनी सांगितले.
निवेदनात असा आरोप करण्यात आला आहे की, संबंधित साखर कारखाना व पेट्रोल पंपाचे संचालक हे सोलापूर जिल्ह्यातील प्रभावशाली लोकप्रतिनिधी असल्यामुळे प्रशासनाकडून अपेक्षित कारवाई होत नसल्याचे दिसून येत आहे. त्यामुळे संपूर्ण प्रकरणाची निष्पक्ष चौकशी करून दोषींवर कठोर कारवाई करण्यात यावी, अशी मागणी करण्यात आली आहे.
हे आंदोलन शेकडो कार्यकर्ते तसेच डॉ. बाबासाहेब आंबेडकर यांच्या विचारांवर कार्य करणाऱ्या विविध सामाजिक संघटनांच्या पाठिंब्याने करण्यात येणार असल्याचे राजहंस यांनी स्पष्ट केले. तसेच प्रशासनाने आंदोलनास आवश्यक परवानगी देऊन सहकार्य करावे, अशी मागणीही त्यांनी केली.

The post जकराया साखर कारखान्याविरोधात रणशिंग! ७ ऑगस्टपासून विधानभवनासमोर बेमुदत धरणे आंदोलन appeared first on Grahak Jagruti News .