८८ कोटींच्या महाघोटाळ्याचा मास्टरमाईंड अखेर जेरबंद! जास्त परताव्याच्या आमिषाने हजारो गुंतवणूकदारांची फसवणूक; आता कठोर कायद्याची मागणी”                                                   जास्त परताव्याचे आमिष दाखवून तब्बल ₹८८ कोटींची आर्थिक फसवणूक करणाऱ्या प्रकरणातील मुख्य आरोपी अविनाश अर्जुन राठोड याला आर्थिक व सायबर गुन्हे शाखा, पुणे शहर यांनी अटक केली आहे. चतुःश्रृंगी पोलीस स्टेशन येथे गुन्हा र. नं. २८१/२०२३ अंतर्गत भारतीय दंड संहितेची कलमे ४२०, ४०६, ४०९, ३४ तसेच एमपीआयडी कायद्यातील कलम ३ व ४ नुसार हा गुन्हा दाखल करण्यात आला होता.

तपासात उघडकीस आलेल्या माहितीनुसार, APS Wealth Ventures LLP या कंपनीचे संचालक अविनाश अर्जुन राठोड व त्याची पत्नी विशाखा अविनाश राठोड यांनी गुंतवणूकदारांना मोठ्या परताव्याचे आश्वासन देऊन लाखो-कोट्यवधी रुपयांची गुंतवणूक स्वीकारली. मात्र करारातील अटींचे पालन न करता गुंतवणूकदारांची फसवणूक केल्याचे निष्पन्न झाले. या प्रकरणात फिर्यादीची सुमारे ₹६८.३७ लाखांची, तर इतर गुंतवणूकदारांची मिळून अंदाजे ₹८८ कोटींची फसवणूक झाल्याचे तपासात समोर आले आहे.
आरोपी परदेशात फरार झाल्याने त्याच्याविरुद्ध लुकआऊट सर्क्युलर (LOC) जारी करण्यात आले होते. विशेष एमपीआयडी न्यायालय, शिवाजीनगर यांनी स्टँडिंग अरेस्ट वॉरंट आणि प्रोक्लेमेशन जारी केले होते. आरोपीचे पासपोर्टही निलंबित करण्यात आले होते. त्यानंतर रेड कॉर्नर नोटीस जारी करण्यात आली आणि संयुक्त अरब अमिराती (UAE) प्रशासनाच्या सहकार्याने आरोपीला भारतात प्रत्यार्पित करण्यात आले.
मुंबई विमानतळावर ताब्यात घेतल्यानंतर त्याला अटक करून न्यायालयात हजर करण्यात आले. न्यायालयाने आरोपीला १० दिवसांची पोलीस कोठडी सुनावली असून आर्थिक गुन्हे शाखेकडून या प्रकरणाचा पुढील तपास सुरू आहे. परदेशात फरार असलेल्या इतर आरोपींना भारतात आणण्यासाठीही कायदेशीर प्रक्रिया सुरू करण्यात आली आहे.

संपादकीय दृष्टीकोन
देशभरात एमएलएम योजना, अनधिकृत गुंतवणूक कंपन्या, शेअर मार्केटमध्ये अवास्तव नफ्याचे आमिष, जमीन-प्लॉट गुंतवणूक योजना अशा विविध माध्यमांतून सर्वसामान्य नागरिकांची कोट्यवधी रुपयांची फसवणूक होत असल्याच्या घटना सातत्याने समोर येत आहेत. अनेक प्रकरणांमध्ये आरोपी कायद्यातील पळवाटा शोधून जामीनावर सुटतात किंवा परदेशात पळ काढतात. त्यामुळे अशा आर्थिक गुन्हे करणाऱ्या आरोपींविरुद्ध अधिक कठोर कायदे, जलद न्यायप्रक्रिया आणि गुंतवणूकदारांच्या पैशांची तातडीने वसुली करण्यासाठी प्रभावी यंत्रणा उभारण्याची मागणी नागरिकांकडून जोर धरत आहे.
नागरिकांनी कोणत्याही योजनेत गुंतवणूक करण्यापूर्वी संबंधित कंपनीची कायदेशीर नोंदणी, नियामक परवानग्या आणि विश्वासार्हता तपासूनच आर्थिक निर्णय घ्यावेत, असे आवाहन तज्ज्ञांकडून करण्यात येत आहे.

The post ८८ कोटींचा गुंतवणूक घोटाळा उघड; सूत्रधार अखेर जेरबंद! appeared first on Grahak Jagruti News .

पुणे शहरात अवैध धंद्यांचे वाढते जाळे, हातभट्टी दारूमुळे झालेल्या मृत्यूंच्या घटना, गुटखा, मटका, जुगार, अमली पदार्थ आणि संघटित गुन्हेगारीमुळे निर्माण झालेल्या गंभीर परिस्थितीच्या पार्श्वभूमीवर पुणे शहर पोलीस आयुक्त अमितेश कुमार यांच्या मार्गदर्शनाखाली परिमंडळ-7 चे पोलीस उपायुक्त (डीसीपी) अभिनाश कुमार (भा.पो.से.) यांनी ‘मिशन क्रॅकडाऊन’ या विशेष मोहिमेची सुरुवात केली आहे.

मोहिमेअंतर्गत अवैध दारू विक्री, मटका-जुगार, अमली पदार्थ, अवैध शस्त्रे, खंडणी, संघटित गुन्हेगारी तसेच समाजविघातक प्रवृत्तींविरोधात सातत्याने कठोर कारवाई करण्यात येणार आहे. यासाठी परिमंडळ-7 मध्ये दोन विशेष पथके स्थापन करण्यात आली असून गुप्त माहितीच्या आधारे नियमित धाडी व विशेष मोहिमा राबविण्यात येत आहेत.
१५ जुलै २०२६ रोजी लोहगाव पोलीस ठाण्याच्या हद्दीत झालेल्या कारवायांमध्ये पोलिसांनी अवैध धंद्यांवर धडक कारवाई करत सहा आरोपींना ताब्यात घेतले.
पहिली कारवाई :-
मोझे आळी, लोहगाव येथील हॉटेल ब्ल्यू डायमंड येथे दुपारी १२.१५ वाजता छापा टाकून चालक हनुमंता शिवलिंगप्पा शिंदे (वय २२) याच्याकडून ₹७,९९० किमतीचा देशी-विदेशी मद्यसाठा व ₹२,००० रोख रक्कम जप्त करण्यात आली. या प्रकरणी हॉटेलचे मूळ मालक सुरज गायकवाड यांच्याविरुद्ध गुन्हा दाखल करण्यात आला.
दुसरी कारवाई :-
दुपारी १ वाजता हॉटेल राजरत्न येथे छापा टाकून चालक संकेत भारत घोडके (वय २८) याच्याकडून ₹४,००५ किमतीचा मद्यसाठा व ₹११,५३० रोख रक्कम जप्त करण्यात आली. या प्रकरणी हॉटेलचे मूळ मालक सुहास प्रविण मोरे यांच्याविरुद्ध गुन्हा दाखल करण्यात आला.
तिसरी कारवाई :
दुपारी २ वाजता यशस्वी हॉटेलच्या मागील पत्र्याच्या शेडमध्ये सुरू असलेल्या मटका अड्ड्यावर धाड टाकण्यात आली. या कारवाईत भाऊसाहेब गोपीनाथ रागपसरे याच्यासह तीन मटका रायटर रंगेहात पकडण्यात आले. त्यांच्याकडून ₹१०,८९० रोख रक्कम, कल्याण व मुंबई टाइम बाजाराचे मटका साहित्य, वापरलेली आठ व न वापरलेली अकरा पावती पुस्तके तसेच दोन मोबाईल फोन जप्त करण्यात आले.
या सर्व कारवायांमध्ये आरोपींविरुद्ध महाराष्ट्र दारूबंदी अधिनियम कलम ६५(ई) अन्वये दोन गुन्हे आणि महाराष्ट्र जुगार प्रतिबंधक अधिनियम कलम १२(अ) अन्वये एक गुन्हा दाखल करण्यात आला असून पुढील तपास लोहगाव पोलीस ठाण्यामार्फत सुरू आहे.
ही कारवाई सहाय्यक पोलीस निरीक्षक गोरक्षनाथ कराड, पोलीस उपनिरीक्षक नितीन राठोड यांच्या मार्गदर्शनाखाली पोलीस हवालदार ब्रेंडे, साबळे, इथापे तसेच पोलीस शिपाई पुंडे, चिंगे आणि सरतापे यांनी गोपनीय माहितीच्या आधारे यशस्वीरीत्या पार पाडली.

नागरिकांना आवाहन..

परिसरात अवैध दारू, मटका, जुगार, अमली पदार्थ, अवैध शस्त्रे, खंडणी किंवा इतर कोणत्याही बेकायदेशीर धंद्याची माहिती असल्यास ती तात्काळ पोलिसांना कळवावी. माहिती देणाऱ्याची ओळख पूर्णपणे गोपनीय ठेवण्यात येईल, असे पोलिसांनी स्पष्ट केले आहे.
डीसीपी अभिनाश कुमार यांनी स्पष्ट शब्दांत सांगितले की, “गुन्हेगारांना कायद्याची भीती आणि नागरिकांना सुरक्षिततेची खात्री” हा ‘मिशन क्रॅकडाऊन’चा मूलमंत्र असून पुणे शहरा मध्ये अवैध धंदे आणि समाजकंटकांविरोधातील धडक कारवाया यापुढेही अधिक तीव्रतेने सुरू राहणार आहेत.

The post पुण्यात अवैध धंदेवाल्यांवर पोलिसांचा प्रहार; ‘मिशन क्रॅकडाऊन’ची दमदार सुरुवात appeared first on Grahak Jagruti News .

कोंढवा परिसरातील बांधकाम व्यावसायिकांना बेकायदेशीर बांधकामाची भीती दाखवून लाखो रुपयांची खंडणी उकळणाऱ्या टोळीविरुद्ध कोंढवा पोलिसांनी मोठी कारवाई करत महाराष्ट्र संघटित गुन्हेगारी नियंत्रण कायदा (MCOCA) अंतर्गत गुन्हा दाखल केला आहे. या कारवाईमुळे खंडणीखोरांवर प्रभावी आळा बसणार असल्याचे पोलिसांनी सांगितले आहे.

पोलिसांनी दिलेल्या माहितीनुसार, जानेवारी २०२४ ते जानेवारी २०२६ या कालावधीत कोंढवा खुर्द परिसरातील एका बांधकाम व्यावसायिकाला वारंवार धमकावून महापालिकेकडे तक्रार करण्याची भीती दाखविण्यात आली. तसेच बांधकाम बंद पाडण्याची धमकी देत रोख रक्कम आणि बीएचके फ्लॅटची मागणी करण्यात आली. याप्रकरणी कोंढवा पोलिस ठाण्यात भारतीय न्याय संहिता (BNS) कलम ३०८(२), ३५१(२)(३) व इतर संबंधित कलमांनुसार गुन्हा दाखल करण्यात आला होता.
तपासादरम्यान संबंधित आरोपी संघटित पद्धतीने खंडणीचे गुन्हे करत असल्याचे निष्पन्न झाल्यानंतर वरिष्ठ पोलिस निरीक्षक संतोष खेतमाळस, सहाय्यक पोलिस आयुक्त मनोज पाटील, पोलिस उपायुक्त राजलक्ष्मी शिवाकर आणि वरिष्ठ अधिकाऱ्यांच्या मार्गदर्शनाखाली MCOCA लागू करण्याचा प्रस्ताव मंजूर करण्यात आला.
यानंतर महाराष्ट्र संघटित गुन्हेगारी नियंत्रण अधिनियम, १९९९ अंतर्गत आरोपी शफी गुलजारखान पठाण आणि समीर शफी पठाण यांना अटक करण्यात आली असून पुढील तपास सहाय्यक पोलिस आयुक्त रामदास इंगवले यांच्या मार्गदर्शनाखाली सुरू आहे.
कारवाईत पोलिस आयुक्त अमितेश कुमार, सहपोलीस आयुक्त संजय दराडे, अपर पोलिस आयुक्त मनोज पाटील, पोलिस उपायुक्त राजलक्ष्मी शिवाकर, सहाय्यक पोलिस आयुक्त रामदास इंगवले, वरिष्ठ पोलिस निरीक्षक संतोष खेतमाळस तसेच कोंढवा पोलिस ठाण्याच्या तपास पथकाने महत्त्वाची भूमिका बजावली.
कायद्याचा धाक निर्माण करण्यासाठी आणि नागरिकांमध्ये सुरक्षिततेची भावना वाढविण्यासाठी कोंढवा पोलिसांनी केलेल्या या कारवाईचे परिसरात स्वागत होत आहे.

The post कोंढवा पोलिसांची धडक कारवाई; बांधकाम व्यावसायिकांना खंडणी उकळणाऱ्या टोळीवर MCOCA अंतर्गत कारवाई appeared first on Grahak Jagruti News .

अनुसूचित जातींमधील आरक्षणाच्या उपवर्गीकरणाच्या मुद्द्यावर राज्यभरात विविध स्तरांवर चर्चा सुरू असताना समाजात मतभेद आणि कटुता वाढू नये, तसेच नवबौद्ध आणि मातंग समाजामध्ये संवाद व परस्पर विश्वासाचे वातावरण निर्माण व्हावे या उद्देशाने पुण्यात “नवबौद्ध-मातंग सलोखा परिषद” आयोजित करण्यात आली.
गुरुवार, २५ जून रोजी बाळासाहेब ठाकरे कला दालन, पुणे येथे झालेल्या या परिषदेत फुले-शाहू-आंबेडकर आणि लोकशाही, सामाजिक न्याय व बंधुता या विचारांच्या अधिष्ठानावर दोन्ही समाजांमध्ये ऐक्याची भूमिका मजबूत करण्याचे आवाहन करण्यात आले.

परिषदेला आंबेडकरी चळवळीतील ज्येष्ठ नेते वसंत साळवे, माजी आमदार जयदेव गायकवाड, ज्येष्ठ नेते रोहिदास गायकवाड, आंबेडकरी अभ्यासक धम्मसंगिनी रमागोरख, विचारवंत व कवी कॉ. महादेव खुडे, मातंग समाजाचे कार्यकर्ते अनिल हतागळे यांनी मार्गदर्शन केले. परिषदेच्या अध्यक्षस्थानी ज्येष्ठ नेते अंकल सोनवणे होते.
परिषदेत आरक्षणाच्या उपवर्गीकरणासंदर्भातील विविध मुद्द्यांवर चर्चा करण्यात आली. यामध्ये बदर समितीचा अहवाल जाहीर करणे, उपवर्गीकरण प्रक्रियेत सर्व अनुसूचित जातींच्या प्रतिनिधी, अभ्यासक व संशोधकांचा समावेश करणे, जातनिहाय जनगणना करून लोकसंख्येच्या प्रमाणात वर्गीकरणाचा विचार करणे, तसेच राज्यभर अशा सलोखा परिषदांचे आयोजन करण्याची गरज व्यक्त करण्यात आली.
याशिवाय फुले, शाहू, डॉ. बाबासाहेब आंबेडकर आणि अण्णाभाऊ साठे यांच्या समतावादी विचारांचा प्रसार करत समाजात द्वेषाऐवजी बंधुता, संवाद आणि सामाजिक ऐक्य वाढविण्यासाठी राज्यव्यापी जनजागृती करण्याचा निर्धार व्यक्त करण्यात आला.
या परिषदेच्या आयोजनात सत्यशोधक बहुजन आघाडीचे अध्यक्ष सचिन बगाडे, नागेश भोसले, नागेश गायकवाड, ॲड. कपिल शिवशरण, राहुल सोनवणे, अरविंद पाटोळे आणि      ॲड. आकाश साबळे यांच्यासह अनेक सामाजिक कार्यकर्त्यांचा सहभाग होता.
परिषदेत उपस्थितांनी आरक्षणाच्या प्रश्नावर मतभेद असू शकतात; मात्र ते लोकशाही, घटनात्मक आणि शांततापूर्ण संवादातून सोडविणे हीच काळाची गरज असल्याचे मत व्यक्त केले. समाजात संघर्षाऐवजी सलोखा, परस्पर सन्मान आणि सामाजिक ऐक्याची भावना दृढ करण्यासाठी अशा उपक्रमांची आवश्यकता असल्याचेही यावेळी अधोरेखित करण्यात आले.

The post आरक्षण वर्गीकरणाच्या वादात सलोख्याचा मार्ग; नवबौद्ध-मातंग समाजाचा संवादासाठी पुढाकार” appeared first on Grahak Jagruti News .

अन्न व औषध प्रशासन (FDA) आयुक्तपदाची सूत्रे हाती घेताच तुकाराम मुंढे यांनी राज्यभरात धडाकेबाज कारवाईचा सपाटा लावला असून, अवघ्या ३० दिवसांत ९०४ ठिकाणी धाडी टाकून तब्बल ₹३४ कोटी ६६ लाख ९० हजार ६२४ किमतीचा प्रतिबंधित गुटखा व पानमसाल्याचा साठा जप्त करण्यात आला आहे. या कारवायांमुळे गुटखा माफियांचे धाबे दणाणले असून, संघटित गुन्हेगारीवर लगाम घालण्यासाठी आता ‘मकोका’ (MCOCA) लागू करण्याचे संकेतही प्रशासनाने दिले आहेत.

केवळ गुटखा माफियांवरच नव्हे, तर सर्वसामान्य ग्राहकांच्या हक्कांच्या संरक्षणासाठीही एफडीएने कठोर भूमिका घेतली आहे. राज्यातील सर्व हॉटेल्स, रेस्टॉरंट्स आणि ढाब्यांमध्ये ग्राहकांना स्वच्छ व मोफत पिण्याचे पाणी देणे बंधनकारक करण्यात आले असून, ग्राहकांना सक्तीने मिनरल वॉटर विकण्याचा प्रकार यापुढे सहन केला जाणार नाही.
यासोबतच, रुग्णालयांनी रुग्णांना स्वतःच्या संलग्न मेडिकलमधूनच औषधे घेण्याची सक्ती केल्यास कठोर कारवाई करण्याचा इशाराही देण्यात आला आहे. प्रत्येक रुग्णाला कोणत्याही परवानाधारक औषध दुकानातून औषधे खरेदी करण्याचा पूर्ण अधिकार असल्याचे प्रशासनाने स्पष्ट केले आहे.
दुग्धजन्य पदार्थ, मावा, खाद्यतेल आणि इतर अन्नपदार्थांतील भेसळ रोखण्यासाठी विशेष मोहीम राबविण्यात येत असून, ऑनलाइन फूड डिलिव्हरी प्लॅटफॉर्म्स आणि नामांकित ब्रँड्सनाही अन्नसुरक्षा नियमांचे पालन करण्यास भाग पाडले जात आहे. नियमांचे उल्लंघन करणाऱ्यांवर दंडात्मक कारवाई सुरू आहे.
महाराष्ट्रातील आवडत्या इडली-डोशाच्या व वडापाव या खाद्य पदार्थच्या गुणवत्तेवरही आता एफडीएची विशेष नजर राहणार आहे. जनतेच्या आरोग्याशी खेळणाऱ्या आस्थापनांवर कठोर कारवाई करत ४५७ जणांना अटक, ४२ वाहने जप्त करण्यात आली असून अनेक आस्थापना सील करण्यात आल्या आहेत.
शिस्त, पारदर्शकता आणि कठोर अंमलबजावणी’ या त्रिसूत्रीवर आधारित ‘मुंढे पॅटर्न’ राज्यातील अन्नसुरक्षा व्यवस्थेत मोठा बदल घडवून आणणार का, याकडे आता संपूर्ण महाराष्ट्राचे लक्ष लागले आहे.

The post मुंढे पॅटर्न’चा धडाका! गुटखा माफियांना थेट इशारा; हॉटेल्स, रुग्णालये आणि भेसळखोरांवरही करडी नजर appeared first on Grahak Jagruti News .

देशातील प्रशासनाच्या कारभारात पारदर्शकता आणण्यासाठी आणि भ्रष्टाचारावर अंकुश ठेवण्यासाठी अस्तित्वात आलेल्या माहितीचा अधिकार (RTI) कायद्यालाच महाराष्ट्र शासनाच्या नव्या महाराष्ट्र माहिती अधिकार नियम २०२६ मुळे मोठा धक्का बसल्याची टीका माहिती अधिकार कार्यकर्ते, पत्रकार आणि सामाजिक कार्यकर्त्यांकडून होत आहे. वाढीव शुल्क, माहिती मागण्याचे कारण सांगण्याची अट आणि नागरिकत्वाचा पुरावा जोडण्याची सक्ती या तरतुदींमुळे RTI चा आत्माच गुदमरला जात असल्याची भावना व्यक्त केली जात आहे.

नव्या नियमांनुसार माहिती अर्जाची फी १० रुपयांवरून ३० रुपये, प्रथम अपील ५० रुपये आणि द्वितीय अपील १०० रुपये करण्यात आली आहे. तसेच प्रति पान माहिती शुल्क २ रुपयांवरून ५ रुपये करण्यात आले आहे. ही वाढ सामान्य नागरिक, शेतकरी, कामगार, विद्यार्थी आणि आर्थिकदृष्ट्या दुर्बल घटकांसाठी अन्यायकारक ठरणार असल्याचा आरोप होत आहे.

गंभीर बाब म्हणजे अर्जदाराने माहिती का हवी याचे प्रयोजन नमूद करण्याची अट. माहिती अधिकार अधिनियम २००५ च्या कलम ६(२) नुसार कोणत्याही नागरिकाला माहिती मागताना कारण देण्याची आवश्यकता नाही. त्यामुळे राज्य सरकारची ही तरतूद केंद्रीय कायद्याच्या मूळ उद्देशालाच हरताळ फासणारी असल्याचा दावा कायदेतज्ज्ञांकडून केला जात आहे.
तसेच प्रत्येक अर्जासोबत नागरिकत्वाचा पुरावा जोडण्याची सक्तीही अनेकांच्या मते अनावश्यक आणि जाचक आहे. ग्रामीण भागातील, वंचित आणि कमी शिक्षित नागरिकांसाठी ही प्रक्रिया अधिक क्लिष्ट बनण्याची शक्यता आहे.
माहितीचा अधिकार हा केवळ माहिती मिळवण्याचा कायदा नसून शासनाला उत्तरदायी धरण्याचे प्रभावी शस्त्र आहे. अनेक घोटाळे, अनियमितता आणि भ्रष्टाचाराची प्रकरणे RTI मुळेच उघडकीस आली आहेत. अशा परिस्थितीत माहिती मिळवण्याची प्रक्रिया अधिक कठीण करणारे नियम म्हणजे भ्रष्टाचाराविरुद्ध लढणाऱ्यांच्या हातातील शस्त्र बोथट करण्याचा प्रयत्न असल्याची टीका होत आहे.
RTI कार्यकर्ते, पत्रकार आणि सामाजिक संघटनांनी या नियमांविरोधात तीव्र नाराजी व्यक्त करत शासनाने तात्काळ पुनर्विचार करून वाढीव शुल्क आणि जाचक अटी रद्द कराव्यात, अशी मागणी केली आहे. लोकशाही मजबूत करण्याचा मार्ग माहिती लपविण्यात नसून ती नागरिकांना सहज उपलब्ध करून देण्यात आहे. अन्यथा “संविधान आणि पारदर्शकता” या घोषणा केवळ कागदावरच उरतील, असा इशाराही देण्यात येत आहे.

The post RTI कमकुवत करण्याचा डाव? नव्या नियमांवर राज्यभर संताप” appeared first on Grahak Jagruti News .

राज्यभरात गुटखा, तंबाखू आणि निकोटीनयुक्त प्रतिबंधित पदार्थांचा काळाबाजार करणाऱ्या रॅकेट्सविरोधात आता थेट मकोकाची कारवाई होणार आहे. अन्न व औषध प्रशासनाचे आयुक्त तुकाराम मुंढे यांनी दिलेल्या आदेशांमुळे राज्यातील गुटखा माफियांचे धाबे दणाणले आहेत.

सार्वजनिक आरोग्याला गंभीर धोका ठरणाऱ्या प्रतिबंधित अन्नपदार्थांच्या अवैध व्यापाराविरोधात अन्न व औषध प्रशासनाने आता आक्रमक भूमिका घेतली आहे. गुटखा, तंबाखू, निकोटीनयुक्त पानमसाला आणि तत्सम पदार्थांच्या उत्पादनापासून ते विक्रीपर्यंत संपूर्ण साखळीवर लक्ष केंद्रित करत संघटित गुन्हेगारीचा तपास करण्याचे निर्देश देण्यात आले आहेत.
तपास यंत्रणांच्या निदर्शनास आलेल्या अनेक प्रकरणांमध्ये केवळ किरकोळ विक्रेते नव्हे, तर उत्पादक, पुरवठादार, वाहतूकदार, गोदाम चालक, घाऊक विक्रेते, वित्तपुरवठादार आणि इतर सहकारी घटकांचे मोठे जाळे कार्यरत असल्याचे समोर आले आहे. काही ठिकाणी बनावट कागदपत्रे, बेनामी व्यवहार, गुप्त गोदामे आणि आंतरराज्य पुरवठा साखळीद्वारे हा व्यवसाय सुरू असल्याचेही उघड झाले आहे.
अन्न सुरक्षा व मानके अधिनियम २००६ अंतर्गत राज्यात या पदार्थांवर बंदी असतानाही सुरू असलेल्या या अवैध व्यापारामुळे युवकांच्या आरोग्यावर गंभीर परिणाम होत असल्याची चिंता व्यक्त करण्यात आली आहे. त्यामुळे अशा प्रकरणांकडे केवळ अन्नसुरक्षा उल्लंघन म्हणून न पाहता, संघटित गुन्हेगारी म्हणून तपास करण्याचा निर्णय घेण्यात आला आहे.
अन्न सुरक्षा व मानके अधिनियमातील तरतुदींनुसार दोषींना कारावास आणि कठोर शिक्षेची तरतूद आहे. आता पात्र प्रकरणांमध्ये मकोका लागू झाल्यास संबंधित आरोपींवर अधिक कठोर कायदेशीर कारवाई होणार आहे.
या निर्णयामुळे राज्यभरातील गुटखा आणि तंबाखू माफियांमध्ये भीतीचे वातावरण निर्माण झाले असून, अवैध व्यापाराविरोधातील लढ्याला नवे बळ मिळाल्याचे मानले जात आहे.

The post “गुटखा माफियांना मोठा झटका; आता थेट मकोकाखाली कारवाई!” appeared first on Grahak Jagruti News .

पुणे, दि. ६ जून : पुणे गुन्हे शाखेच्या अंमली पदार्थ विरोधी पथकाने खराडी परिसरात धडक कारवाई करत पॉपी स्ट्रॉ (अफू) या अंमली पदार्थाची विक्री करणाऱ्या एका इसमाला अटक केली आहे. आरोपीकडून तब्बल १३ किलो ८० ग्रॅम पॉपी स्ट्रॉ जप्त करण्यात आला असून त्याची किंमत सुमारे २ लाख ६१ हजार ६०० रुपये असल्याची माहिती

अंमली पदार्थ विरोधी पथक-१ चे वरिष्ठ पोलीस निरीक्षक वाहिद पठाण यांच्या मार्गदर्शनाखाली पथक परिसरात गस्त घालत असताना खराडकर पार्क, थिटे वस्ती, साईकृपा बिल्डिंगसमोर एक इसम दोन गोण्यांसह संशयास्पदरीत्या उभा असल्याचे आढळून आले. पोलिसांनी त्याला ताब्यात घेऊन चौकशी केली असता त्याची उत्तरे संशयास्पद वाटल्याने झडती घेण्यात आली.झडतीदरम्यान आरोपी मुकेश विष्णाई (वय ३०, रा. खराडकर पार्क, थिटे वस्ती, खराडी, पुणे) याच्या ताब्यातील गोण्यांमधून १३ किलो ८० ग्रॅम पॉपी स्ट्रॉ (अफू) हा अंमली पदार्थ जप्त करण्यात आला. हा साठा बेकायदेशीररित्या विक्रीसाठी ठेवण्यात आल्याचे तपासात समोर आले.
याप्रकरणी खराडी पोलीस ठाण्यात एनडीपीएस कायद्यान्वये गुन्हा दाखल करण्यात आला असून पुढील तपास सुरू आहे.
ही कारवाई पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त (गुन्हे) तेजस्वी सातपुते, पोलीस उपआयुक्त (गुन्हे) गौरव हसन आणि सहायक पोलीस आयुक्त शंकर खटके यांच्या मार्गदर्शनाखाली करण्यात आली.

 पुणे पोलिसांच्या अमली पदार्थ विरोधी कडक धोरणामुळे हा प्रकार उघडीसआला यामुळे देखील विशेष लक्ष घालून, लक्ष ठेवून अशा रेव पार्ट्यांवर पोलिसांची कठोर कारवाई केली जाईल या प्रकरणातील संबंधित आरोपीवर कठोर कारवाई केली जाईल जाणार आहे. 

पोलीस आयुक्त :- अमितेश कुमार 

The post खराडीत अंमली पदार्थांचा मोठा साठा जप्त; २.६१ लाखांचा ‘पॉपी स्ट्रॉ’सह तस्कर जेरबंद appeared first on Grahak Jagruti News .

मालकाच्या हालचालींची माहिती मिळवून त्याच्यावरच दरोडा टाकण्याचा कट रचणाऱ्या कर्मचाऱ्यासह त्याच्या साथीदारांना सहकारनगर पोलिसांनी अवघ्या काही दिवसांत जेरबंद केले आहे. या कारवाईत पोलिसांनी तब्बल २५ लाख २० हजार रुपयांचा मुद्देमाल हस्तगत केला असून, आरोपींकडून भारतीय तसेच परकीय चलन जप्त करण्यात आले आहे.

दिनांक २५ मे २०२६ रोजी दुर्वांकुर कार्यालयाजवळ, धनकवडी पोस्ट ऑफिस रोड, संभाजीनगर येथे ही घटना घडली होती. आर्या फॉरेक्स प्रा. लि., मार्केटयार्ड रोड, गुलटेकडी येथील कार्यालयासाठी जात असताना फिर्यादी यांच्या डोळ्यांवर आणि चेहऱ्यावर स्प्रे मारून दोन अज्ञात इसमांनी त्यांच्या ताब्यातील २५ लाख ९० हजार रुपयांची रोख रक्कम व परकीय चलन असलेली बॅग जबरदस्तीने हिसकावून नेली होती.
या प्रकरणी सहकारनगर पोलीस ठाण्यात गुन्हा क्रमांक २०९/२०२६ अन्वये भारतीय न्याय संहिता कलम ३०९(६), ३(५) प्रमाणे गुन्हा दाखल करण्यात आला होता. या गुन्ह्याचा तपास सहाय्यक पोलीस निरीक्षक स्वप्नील लोहार करीत होते.
घटनेचा तपास करताना पोलिसांनी परिसरातील सीसीटीव्ही फुटेजची तपासणी केली. त्यानंतर मिळालेल्या गोपनीय माहितीनुसार आंबेगाव पठार परिसरातून एका विधिसंघर्षित बालकाला ताब्यात घेण्यात आले. चौकशीत त्याने आपल्या साथीदारांसह हा गुन्हा केल्याची कबुली दिली.
तपासात उघड झाले की, फिर्यादी यांच्या कार्यालयात काम करणारा युवराज गणेश वैराट (वय २४) यानेच संपूर्ण कट रचला होता. त्याच्या सांगण्यावरून करण भगवान कोंढाळकर (१९), यश भगवान कोंढाळकर (२१), जुनेद जमिल शेख (१९), ऋतुराज शिवाजी गोरे (२१) तसेच एका विधिसंघर्षित बालकाने मिळून हा दरोडा घातला होता.
पोलिसांनी सर्व आरोपींना अटक केली असून विधिसंघर्षित बालकास बाल न्याय मंडळ, येरवडा येथे हजर करण्यात आले आहे. आरोपींकडून २४ लाख ३० हजार रुपये भारतीय चलन आणि सुमारे ९० हजार रुपये किमतीचे परकीय चलन असा एकूण २५ लाख २० हजार रुपयांचा मुद्देमाल जप्त करण्यात आला आहे.

ही उल्लेखनीय कामगिरी अपर पोलीस आयुक्त राजेंद्र बनसोडे, पोलीस उपआयुक्त मिलिंद मोहिते, सहाय्यक पोलीस आयुक्त धन्यकुमार गोडसे यांच्या मार्गदर्शनाखाली वरिष्ठ पोलीस निरीक्षक विठ्ठल पवार व पोलीस निरीक्षक (गुन्हे) संतोष जाधव यांच्या सूचनेनुसार सहाय्यक पोलीस निरीक्षक स्वप्नील लोहार, पोलीस उपनिरीक्षक गणेश कर्चे तसेच तपास पथकातील पोलीस अंमलदार शिवतरे, सुतकर, भगत आणि सहकाऱ्यांनी पार पाडली.

The post विश्वासघाताचा कळस! मालकावरच दरोडा टाकणारी टोळी पोलिसांच्या जाळ्यात appeared first on Grahak Jagruti News .

पुणे आणि पिंपरी-चिंचवड परिसराला हादरवून सोडणाऱ्या विषारी दारूकांडाचे मृत्युतांडव थांबण्याची चिन्हे दिसत नसून शनिवारी आणखी तिघांचा मृत्यू झाल्याने मृतांचा आकडा २२ वर पोहोचला आहे. फुगेवाडीतील दोघांसह हडपसरमधील ससाणेनगर येथील एका नागरिकाचा उपचारादरम्यान मृत्यू झाला. या घटनेमुळे परिसरात भीती आणि संतापाचे वातावरण निर्माण झाले आहे.

मृतांमध्ये राजेंद्र टप्पे (वय ३६, रा. फुगेवाडी), महेंद्र ओवाळ (वय ५८, रा. दापोडी) आणि संजय लिंकन धैर्यम (वय ४९, रा. ससाणेनगर, हडपसर) यांचा समावेश आहे. तिघांचाही मृत्यू विषारी दारू प्राशनामुळे झाल्याचा आरोप त्यांच्या नातेवाईकांनी केला आहे.
या नव्या मृत्यूंमुळे फुगेवाडीतील मृतांची संख्या १५ वर, तर हडपसर परिसरातील मृतांची संख्या ७ वर पोहोचली आहे. याशिवाय आठहून अधिक नागरिकांवर विविध रुग्णालयांच्या अतिदक्षता विभागात उपचार सुरू असल्याची माहिती समोर आली आहे.
दरम्यान, या गंभीर प्रकरणाचा तपास वेगाने करण्यासाठी सीआयडीने दोन विशेष तपास पथके नियुक्त केली असून विषारी दारू तयार करण्यासाठी वापरण्यात आलेल्या मिथेनॉलचा पुरवठा करणाऱ्या कंपनीवर अन्न व औषध प्रशासनाने (FDA) छापेमारी कारवाई सुरू केली आहे.
या प्रकरणात राज्य उत्पादन शुल्क विभागाच्या भूमिकेवर गंभीर प्रश्नचिन्ह उपस्थित झाल्यानंतर विभागाने मोठी कारवाई करत १३ अधिकारी व कर्मचाऱ्यांना तत्काळ निलंबित केले आहे. अवैध हातभट्टी दारू अड्ड्यांवर कारवाई करण्यात अपयश आणि कर्तव्यात गंभीर हलगर्जीपणा केल्याचा ठपका ठेवण्यात आला आहे.
राज्य उत्पादन शुल्क आयुक्त डॉ. राजेश देशमुख यांनी महाराष्ट्र नागरी सेवा (शिस्त व अपील) नियम, १९७९ अंतर्गत निलंबनाचे आदेश जारी केले आहेत. निलंबित अधिकाऱ्यांमध्ये निरीक्षक, दुय्यम निरीक्षक आणि जवानांचा समावेश असून त्यांना निलंबन काळात कोणतीही खासगी नोकरी किंवा व्यवसाय करता येणार नसल्याचे आदेशात स्पष्ट करण्यात आले आहे.
विषारी दारूकांडातील वाढता मृत्यूदर, प्रशासनाची कथित निष्क्रियता आणि अवैध दारू व्यवसायाचे वाढते जाळे यामुळे नागरिकांमध्ये तीव्र संताप व्यक्त होत असून दोषींवर कठोर कारवाईची मागणी जोर धरू लागली आहे.

The post विषारी दारूकांडाचे मृत्युतांडव सुरूच! मृतांचा आकडा २२ वर; १३ अधिकारी निलंबित.. appeared first on Grahak Jagruti News .