इराण–अमेरिका–इस्त्रायल युद्धाच्या पार्श्वभूमीवर देशात गॅस टंचाई निर्माण झाल्याचा गैरफायदा घेत काही टोळ्या अवैधरित्या गॅस साठवणूक व विक्री करत असल्याची माहिती समोर येत होती. याच पार्श्वभूमीवर वरिष्ठ पोलीस अधिकाऱ्यांनी पुणे शहरातील हांडेवाडी परिसरात घरगुती गॅसचा अवैध साठा करून काळाबाजार करणाऱ्या इसमावर काळेपडळ पोलीसांनी मोठी कारवाई करत तब्बल १०३ गॅस सिलेंडर आणि चारचाकी वाहनासह आरोपीस अटक केली आहे.

काळेपडळ पोलीस स्टेशन हद्दीत विशेष तपास व पेट्रोलिंग सुरू होते.
दरम्यान, पोलीस अंमलदार महादेव शिंदे यांना मिळालेल्या गोपनीय माहितीनुसार हांडेवाडी परिसरातील काव्या मल्टी सर्व्हिसेस येथे छापा टाकण्यात आला. छाप्यात एक इसम घरगुती गॅस सिलेंडरमधून व्यावसायिक व ५ किलोच्या सिलेंडरमध्ये गॅस ट्रान्सफर करत असल्याचे उघड झाले. ही प्रक्रिया अत्यंत धोकादायक असून मानवी जीवितास गंभीर धोका निर्माण करणारी आहे.
पोलिसांनी आरोपी नितीन हनुमंत होळकर (वय ३८, रा. हांडेवाडी, पुणे) यास ताब्यात घेतले. चौकशीदरम्यान त्याच्याकडे कोणताही अधिकृत परवाना नसल्याचे निष्पन्न झाले. या कारवाईत १०३ गॅस सिलेंडर व एक मारुती सुझुकी सुपर कॅरी टेम्पो असा एकूण सुमारे १०,०९,३००/- रुपयांचा मुद्देमाल जप्त करण्यात आला आहे.
सदर प्रकरणी काळेपडळ पोलीस स्टेशन येथे गु.र.नं. १६४/२०२६ अंतर्गत अत्यावश्यक वस्तू अधिनियम कलम ३ व ७ अन्वये गुन्हा दाखल करण्यात आला आहे.
ही धडाकेबाज कारवाई पोलीस उपआयुक्त (परिमंडळ ६) श्री. राजकुमार शिंदे, सहाय्यक पोलीस आयुक्त हडपसर विभाग श्री. अतुलकुमार नवगिरे यांच्या मार्गदर्शनाखाली वरिष्ठ पोलीस निरीक्षक श्री. मानसिंग पाटील यांच्या नेतृत्वाखाली करण्यात आली. पोलीस निरीक्षक अमित शेटे तसेच गुन्हे शाखेच्या पथकाने ही यशस्वी कारवाई पार पाडली.

गॅस काळाबाजार करणाऱ्यांवर पोलिसांचा कडक इशारा – “अवैध साठा व विक्री सहन केली जाणार नाही!”

The post गॅस टंचाईत काळाबाजार फोफावला; पुण्यात १०३ सिलेंडरसह मोठी कारवाई! appeared first on Grahak Jagruti News .

महाराष्ट्रात चर्चेत असलेल्या कॅप्टन अशोक खरात उर्फ भोंदू बाबा प्रकरणाला नवे वळण मिळाले असून, त्यांच्या कथित बेनामी संपत्तीबाबत गंभीर आरोप समोर आले आहेत. आयकर विभागाच्या (बेनामी प्रॉपर्टी) कक्षाकडे या प्रकरणाची तक्रार आनंद राजहंस यांनी दाखल केली असून, उत्पन्नाच्या मानाने मोठ्या प्रमाणात संपत्ती जमा केल्याचा आरोप करण्यात आला आहे.

तक्रारीनुसार, KARMA Construction LLP या कंपनीचे संचालक आकाश चौधरी आणि निलेश चाकणकर यांचा या व्यवहारात सहभाग असल्याची शक्यता व्यक्त करण्यात आली आहे. तसेच Geeta Agro & Infrastructure Pvt. Ltd. आणि Multiventure Estates Private Limited या कंपन्यांमधील काही व्यवहारांवरही संशय व्यक्त करण्यात आला आहे. या कंपन्यांमध्ये पूर्वी काही राजकीय व्यक्तींचा सहभाग असल्याचेही तक्रारीत नमूद करण्यात आले आहे.
याशिवाय, रायगड जिल्ह्यातील काही प्रभावशाली राजकीय व्यक्तींनी पडद्यामागून आर्थिक व्यवहारात मदत केल्याचा आरोप करण्यात आला आहे. बाळगंगा प्रकल्पातील जमीन खरेदी व्यवहार आणि कथित सिंचन घोटाळ्यातील निधीचा वापर करून काळा पैसा पांढरा करण्यात आल्याची शक्यता व्यक्त करण्यात आली आहे.
तक्रारदारांनी सांगितले की, या प्रकरणात केवळ अशोक खरात यांच्याच भूमिकेचा तपास न करता, त्यांच्या माध्यमातून कोण राजकीय किंवा आर्थिक फायदा घेत आहे का, तसेच ब्लॅकमेलिंगसारखे प्रकार होत आहेत का, याचाही सखोल तपास करावा.
सुमारे सात महिन्यांपूर्वी बाळगंगा प्रकल्पातील जमीन खरेदी प्रकरणी करण्यात आलेल्या तक्रारीवर सध्या चौकशी सुरू असून, कर्जत तालुक्यातील काही नेत्यांचाही तपास सुरू असल्याचे समजते. या पार्श्वभूमीवर संबंधित प्रकरण अधिकच गंभीर बनले आहे.
तक्रारदारांनी सांगितले की, विविध सामाजिक संघटना, महिला संघटना आणि समाजातील प्रतिष्ठित व्यक्तींचा पाठिंबा त्यांना मिळत असून, येत्या सहा ते सात दिवसांत पत्रकार परिषद घेऊन सर्व पुरावे आणि माहिती जनतेसमोर मांडण्यात येणार आहे.
दरम्यान, अशा प्रकारांमुळे महाराष्ट्राच्या पुरोगामी परंपरेला धक्का बसत असल्याची भावना व्यक्त करत, संबंधित प्रकरणाची निष्पक्ष व सखोल चौकशी करून सत्य जनतेसमोर आणण्याची मागणी करण्यात येत आहे….

The post कोट्यवधींच्या संपत्तीचा खेळ? भोंदू बाबा अशोक खरात प्रकरणात नवे खुलासे… appeared first on Grahak Jagruti News .

टिंबर मार्केट परिसरातून अपहरण करण्यात आलेल्या व्यापाऱ्याची अवघ्या २४ तासांत सुखरूप सुटका करत पुणे गुन्हे शाखेने धडाकेबाज कामगिरी बजावली आहे. या प्रकरणी १ कोटी ५० लाख रुपयांची खंडणी मागणाऱ्या ५ आरोपींना पोलिसांनी अटक केली आहे…

दिनांक २४ मार्च २०२६ रोजी गुलटेकडी परिसरात राहणाऱ्या एका व्यापाऱ्याचे टिंबर मार्केट येथून काही इसमांनी अपहरण केले. अपहरणानंतर आरोपींनी व्यापाऱ्याच्या पत्नीला तब्बल १.५ कोटी रुपयांची खंडणी मागितली. याप्रकरणी स्वारगेट पोलीस ठाण्यात गुन्हा दाखल करण्यात आला होता.
घटनेचे गांभीर्य लक्षात घेऊन गुन्हे शाखेने तात्काळ तपासाची सूत्रे हाती घेत दोन विशेष पथके तयार केली. आरोपींनी खंडणीची रक्कम स्वारगेट येथील मित्र मंडळ चौकात आणण्यास सांगितल्याने पोलिसांनी सापळा रचला.
रक्कम स्वीकारण्यासाठी आलेल्या दोन आरोपींना पोलिसांनी शिताफीने ताब्यात घेतले. चौकशीदरम्यान त्यांनी अपहरणात सामील इतर तीन साथीदारांची माहिती दिली. मिळालेल्या माहितीनुसार पोलिसांनी तातडीने खेड शिवापूर येथे धाड टाकून अपहृत व्यापाऱ्याची सुखरूप सुटका केली आणि उर्वरित तिघांनाही अटक केली.
अटक करण्यात आलेले सर्व आरोपी सराईत गुन्हेगार असून त्यांच्यावर पुणे शहर व ग्रामीण भागात विविध गुन्हे दाखल असल्याची माहिती पोलिसांनी दिली आहे.
या प्रकरणाचा पुढील तपास स्वारगेट पोलीस करत आहेत.
ही कारवाई पुणे शहर पोलीस आयुक्त अमितेश कुमार यांच्या मार्गदर्शनाखाली गुन्हे शाखेच्या विविध पथकांनी संयुक्तरित्या पार पाडली.

The post स्वारगेटमध्ये खंडणी रॅकेटचा पर्दाफाश – अपहृत व्यापाऱ्याची सुटका, ५ आरोपी अटकेत” appeared first on Grahak Jagruti News .

नाशिकमध्ये चर्चेत असलेल्या भोंदूबाबा अशोक खरात प्रकरणाने दिवसेंदिवस अधिक गंभीर वळण घेतलं असून तपासादरम्यान अनेक धक्कादायक बाबी समोर येत आहेत. आरोपी अशोक खरातला आज न्यायालयात हजर करण्यात आलं असता, त्याच्या पोलीस कोठडीबाबत महत्त्वाची सुनावणी पार पडली.

क्राईम ब्रांच आणि विशेष तपास पथक (SIT) या प्रकरणाचा सखोल तपास करत असून, आरोपीची पोलीस कोठडी संपत असल्याने ती वाढवण्याची मागणी करण्यात आली होती. सरकारी वकील शैलेंद्र बागडे यांनी न्यायालयात सांगितलं की, प्रकरण अत्यंत गंभीर असून तपासासाठी आणखी वेळ आवश्यक आहे. विशेषतः लैंगिक अत्याचाराशी संबंधित डिजिटल पुरावे गोळा करण्याचं काम अद्याप सुरू आहे.
तपासादरम्यान आतापर्यंत सहा गुन्हे दाखल झाले असून, अनेक महिलांनी आरोपीविरोधात तक्रारी दिल्या आहेत. या तक्रारींची चौकशी अत्यंत गोपनीय पद्धतीने केली जात आहे.
या प्रकरणाला अधिक धक्कादायक वळण देणारी बाब म्हणजे आरोपीकडून एक पिस्तूल जप्त करण्यात आलं असून, त्याचा वापर करून पाच नरबळी दिल्याचा संशय व्यक्त करण्यात येत आहे. यासंदर्भात काही प्राथमिक पुरावे पोलिसांच्या हाती लागल्याची माहिती समोर आली आहे. तसेच आरोपीकडे काही मालमत्तेची कागदपत्रेही आढळून आली असून, त्याद्वारे अनेकांची फसवणूक झाल्याचा संशय आहे.
याशिवाय, अशोक खरात भक्तांना साप आणि वाघ दाखवायचा, बोटात घालायचे खडे व ‘मिश्रित पाणी’ यांचा वापर करायचा, अशी माहितीही तपासात उघड झाली आहे. त्याच्याकडून पाच जिवंत काडतुसेही जप्त करण्यात आली आहेत.
दरम्यान, या प्रकरणाच्या सुनावणीसाठी न्यायालयात मोठी गर्दी झाली होती. अखेर न्यायालयाने अशोक खरात याला २९ मार्चपर्यंत पोलीस कोठडी सुनावली आहे.
एकूणच, भोंदूबाबा अशोक खरात प्रकरण दिवसेंदिवस अधिक गुंतागुंतीचं आणि संवेदनशील होत असून, पुढील तपासात आणखी कोणते धक्कादायक खुलासे होतात याकडे सर्वांचं लक्ष लागलं आहे.

The post नाशिक हादरलं! भोंदूबाबा अशोक खरात प्रकरणात धक्कादायक खुलासे – ५ नरबळींचा संशय, कोर्टाने पोलीस कोठडी वाढवली!” appeared first on Grahak Jagruti News .

युनिट १, गुन्हे शाखा पुणे शहर यांनी पुन्हा एकदा प्रभावी कारवाई करत बिबवेवाडी परिसरात वाहन चोरी करणाऱ्या सराईत गुन्हेगाराला अटक केली आहे. विश्रामबाग पोलीस स्टेशन येथे दाखल असलेल्या गुन्हा रजिस्टर नं. ३५७/२०२५ (बीएनएस कलम ३०३ (२)) अंतर्गत सुरू असलेल्या तपासादरम्यान ही कारवाई करण्यात आली.

दिनांक १८ मार्च २०२६ रोजी, पोलीस उपनिरीक्षक राहुल मखरे व त्यांच्या पथकाने गुप्त माहितीच्या आधारे आरोपीचा शोध सुरू केला. पोलीस अंमलदार मठपती यांना त्यांच्या गुप्त बातमीदारामार्फत माहिती मिळाली की, संबंधित आरोपी हा बिबवेवाडीतील सुपर इंदिरानगर परिसरात राहत आहे.
ही माहिती वरिष्ठ पोलीस निरीक्षक अजित जाधव यांना देण्यात आल्यानंतर त्यांच्या मार्गदर्शनाखाली तातडीने कारवाई करण्यात आली. पोलिसांनी दिलेल्या पत्त्यावर छापा टाकून सुरज शिवाजी सुरवसे (वय २५ वर्षे) याला ताब्यात घेतले.
तपासादरम्यान आरोपीकडून चोरीस गेलेली सुमारे २५,००० रुपये किंमतीची होंडा युनिकॉर्न (सिल्वर रंग, MH 12 GP 3361) ही दुचाकी जप्त करण्यात आली आहे.
सदर गुन्ह्याचा पुढील तपास विश्रामबाग पोलीस स्टेशन करत असून आरोपीकडून आणखी गुन्ह्यांची उकल होण्याची शक्यता पोलिसांनी व्यक्त केली आहे.
ही यशस्वी कारवाई अपर पोलीस आयुक्त पंकज देशमुख, पोलीस उप आयुक्त (गुन्हे) निखिल पिंगळे, सहाय्यक पोलीस आयुक्त शैलेश संखे यांच्या मार्गदर्शनाखाली पोलीस निरीक्षक अजित जाधव व त्यांच्या पथकाने पार पाडली.

नागरिकांना आवाहन :-
वाहन सुरक्षित ठिकाणी पार्क करावे व संशयास्पद हालचाली दिसल्यास तात्काळ पोलिसांना कळवावे

The post बिबवेवाडीतील सराईत वाहनचोर पोलिसांच्या जाळ्यात; चोरीची दुचाकी जप्त! appeared first on Grahak Jagruti News .

पुणे शहरात दहशत माजविण्याच्या उद्देशाने जवळ देशी बनावटीचे पिस्तूल बाळगणाऱ्या एका सराईत आरोपीस पर्वती पोलीस स्टेशनच्या तपास पथकाने शिताफीने जेरबंद केले. आरोपीकडून देशी पिस्तूल व जिवंत काडतूस असा एकूण ४० हजार ५०० रुपयांचा मुद्देमाल जप्त करण्यात आला आहे.

दि. १३ मार्च २०२६ रोजी पर्वती पोलीस स्टेशन हद्दीत वरिष्ठ पोलीस निरीक्षक राजेंद्र सहाणे यांच्या मार्गदर्शनाखाली तपास पथक प्रभारी अधिकारी पोलीस उपनिरीक्षक किरण पवार व त्यांच्या पथकातील कर्मचारी पेट्रोलिंग करत होते. त्यावेळी पोलीस हवालदार महेश मंडलिक यांना मिळालेल्या गोपनीय माहितीच्या आधारे सापळा रचण्यात आला.
या कारवाईत आरोपी अजित सागर कसबे (वय २१, रा. स. नं. १५, विघ्नहर्ता सोसायटी, फ्लॅट नं. ५०४, आंबेगाव पठार, धनकवडी, पुणे) यास ताब्यात घेण्यात आले. झडतीदरम्यान त्याच्याकडून १ देशी बनावटीचे पिस्तूल व १ जिवंत काडतूस असा एकूण ₹४०,५०० किमतीचा मुद्देमाल जप्त करण्यात आला.
या प्रकरणी पर्वती पोलीस स्टेशन येथे गुन्हा रजिस्टर नं. ६८/२०२६ अन्वये भारतीय हत्यार कायदा कलम ३(२५) तसेच महाराष्ट्र पोलीस अधिनियम कलम ३७(१) सह १३५ अंतर्गत गुन्हा दाखल करण्यात आला आहे.
सदर कारवाई अपर पोलीस आयुक्त (पश्चिम प्रादेशिक विभाग) राजेश बनसोडे, पोलीस उप आयुक्त परिमंडळ-०२ मिलिंद मोहिते, सहायक पोलीस आयुक्त स्वारगेट विभाग धन्यकुमार गोडसे यांच्या मार्गदर्शनाखाली करण्यात आली. तसेच वरिष्ठ पोलीस निरीक्षक राजेंद्र सहाणे व पोलीस निरीक्षक (गुन्हे) अनिता हिवरकर यांच्या नेतृत्वाखाली पोलीस उपनिरीक्षक किरण पवार व पोलीस कर्मचारी प्रकाश मरगजे, महेश मंडलिक, सुर्या जाधव, अमित चिव्हे, मनोज बनसोड, राकेश सुर्वे, सद्दाम शेख व अमोल दबडे यांनी ही कामगिरी बजावली.

The post “पुण्यात दहशत माजविण्याचा डाव उधळला! देशी पिस्तूलसह सराईत आरोपी पर्वती पोलिसांच्या जाळ्यात” appeared first on Grahak Jagruti News .

पुणे शहरातील शिवाजीनगर पोलीस स्टेशन हद्दीत 10 वी महाराष्ट्र बोर्ड परीक्षेचा पेपर लीक झाल्याचा बनाव करून विद्यार्थ्यांची आर्थिक फसवणूक करणाऱ्या एका तरुणाचा धक्कादायक प्रकार उघडकीस आला आहे. टेलिग्राम अ‍ॅपवरील तांत्रिक “Replace” ट्रिक वापरून विद्यार्थ्यांना पेपर आधीच लीक झाल्याचा आभास निर्माण करण्यात आला होता. या प्रकारामुळे परीक्षा देणाऱ्या विद्यार्थ्यांमध्ये भीती व संभ्रमाचे वातावरण निर्माण झाले आहे.

पोलिस तपासात चैतन्य विनोद शेंडे (वय १८) या आरोपीने अत्यंत चलाख पद्धतीने विद्यार्थ्यांना गंडा घातल्याचे कबूल केले आहे. आरोपी टेलिग्रामवरील ग्रुपमध्ये पासवर्ड प्रोटेक्टेड PDF फाईल अपलोड करून “माझ्याकडे उद्याच्या परीक्षेचा प्रश्नपत्रिका पेपर आहे” असा दावा करत होता. तो विद्यार्थ्यांकडून सुमारे ₹600 आकारून पेपर देण्याचे आमिष दाखवत असे.
अशी रचली होती फसवणुकीची योजना
पोलिस तपासात या संपूर्ण फसवणुकीची पद्धत समोर आली आहे –
परीक्षेच्या एक दिवस आधी आरोपी टेलिग्राम ग्रुपमध्ये पासवर्ड प्रोटेक्टेड PDF फाईल अपलोड करत असे.
त्यानंतर “उद्याचा पेपर माझ्याकडे आहे” असा दावा करून ₹600 मध्ये पेपर देण्याची ऑफर दिली जात असे.
काही विद्यार्थ्यांनी पैसे पाठवल्यानंतर आरोपी त्यांना तात्काळ ब्लॉक करत असे.
परीक्षा संपल्यानंतर आरोपी खरी प्रश्नपत्रिका मिळवून आधी अपलोड केलेली PDF फाईल ‘Replace’ करत असे.
त्यामुळे टेलिग्रामवर पेपर आधीच अपलोड केला होता असा खोटा पुरावा तयार होत असे.
‘Replace’ ट्रिकमुळे निर्माण झाला खोटा कालक्रम
पोलिसांच्या माहितीनुसार, टेलिग्राममध्ये एकदा अपलोड केलेली फाईल नंतर बदलली तरी मूळ अपलोडची वेळ (टाइमस्टॅम्प) तशीच राहते आणि फक्त “Edited” असा उल्लेख दिसतो. या तांत्रिक सुविधेचा गैरवापर करून आरोपीने पेपर आधीपासूनच त्याच्याकडे असल्याचा खोटा आभास निर्माण केला.
विद्यार्थ्यांना पोलिसांचे आवाहन
या प्रकारामुळे बोर्ड परीक्षेच्या काळात विद्यार्थ्यांमध्ये भीती आणि संभ्रमाचे वातावरण निर्माण झाले आहे. पोलिसांनी विद्यार्थ्यांना सोशल मीडियावर फिरणाऱ्या पेपर लीकच्या अफवांवर विश्वास ठेवू नये तसेच कोणत्याही अनोळखी व्यक्तीला पैसे पाठवू नयेत, असे आवाहन केले आहे.
या प्रकरणी पुढील तपास सुरू असून, अशा प्रकारच्या ऑनलाईन फसवणूक करणाऱ्या इतर व्यक्तींचा शोधही पोलीस घेत आहेत…

The post “10 वी बोर्ड पेपरफुटीची अफवा; टेलिग्रामवरील चलाख ट्रिक उघड, आरोपीचा धक्कादायक खुलासा” appeared first on Grahak Jagruti News .

पुणे महानगरपालिकेच्या बांधकाम विकास विभागातील कथित भ्रष्टाचार, बेकायदेशीर बांधकामे, शासकीय जमिनींचा गैरवापर आणि बनावट कागदपत्रांच्या आधारे मिळवण्यात आलेल्या परवान्यांच्या विरोधात आंदोलनकर्त्यांनी अन्नत्याग सत्याग्रहाचा इशारा दिला आहे. संबंधित प्रकरणांची सखोल चौकशी करून दोषींवर तात्काळ फौजदारी कारवाई करावी, अशी मागणी आंदोलनकर्त्यांनी केली आहे.

आंदोलनकर्त्यांच्या मते, वडगाव बुद्रुक येथील ‘एलिझा लाईफस्टाईल’ या इमारतीसाठी पाटबंधारे विभागाच्या सुमारे ३९ गुंठे संपादित शासकीय जागेचे खोटे कागदपत्र तयार करून एफएसआयमध्ये मोठा घोटाळा करण्यात आला आहे. तसेच भारत संरक्षण मंत्रालयाचे (MOD) कथित बनावट ‘ना हरकत प्रमाणपत्र’ सादर करून पुणे महानगरपालिकेकडून भोगवटा प्रमाणपत्र मिळविण्यात आल्याचा गंभीर आरोप करण्यात आला आहे. त्यामुळे या इमारतीचा भोगवटा तात्काळ रद्द करून जागामालक बाळासाहेब जाधव, विकसक महेश पुनरे, आर्किटेक्ट सिद्धार्थ हरिश्चंद्र व संबंधितांवर फौजदारी गुन्हा दाखल करण्याची मागणी करण्यात आली आहे.
तसेच वडगाव बुद्रुक, सिंहगड कॉलेज रोड येथील ‘कृष्ण कुंज रेसिडेन्सी’ या प्रकल्पामध्येही संरक्षण मंत्रालयाचे बनावट ना हरकत प्रमाणपत्र सादर केल्याचा आरोप करण्यात आला आहे. शिवाय इमारतीमागील ओढ्यावर अतिक्रमण करून बांधकाम करण्यात आल्याचा दावा आंदोलनकर्त्यांनी केला आहे. या प्रकरणात जागामालक बाळासाहेब जाधव, विकसक सोपान लंके तसेच खीरे-भिडे आर्किटेक्ट यांच्यावर फौजदारी गुन्हा दाखल करून संबंधित आर्किटेक्टना काळ्या यादीत टाकण्याची मागणी करण्यात आली आहे.
याशिवाय सिंहगड रोड परिसरातील पुणे महानगरपालिकेच्या मालकीच्या सुमारे १०० गुंठे जागेवर अधिकारी आणि विकासकांच्या संगनमताने बांधकाम परवाना देण्यात आल्याचा आरोप आंदोलनकर्त्यांनी केला आहे. या जागेवरील बेकायदेशीर बांधकाम तात्काळ पाडून संबंधित अधिकारी, जागामालक व विकासकांवर गुन्हा दाखल करावा, अशी मागणी करण्यात आली आहे.
तसेच वडगाव बुद्रुक येथील पाटबंधारे विभागाच्या जागेवर झोन क्रमांक २ च्या बांधकाम विकास विभागाने दिलेला बांधकाम परवाना रद्द करावा, अशी मागणी करण्यात आली आहे.
दरम्यान, टीडीआर सेलच्या तत्कालीन उपअभियंता आशालता साळवी यांनी वडगाव खुर्द येथील विशाल जगदीश देशपांडे व इतरांना दिलेली डीआरसी (DRC) रद्द करून त्यांना तात्काळ निलंबित करावे आणि त्यांनी दिलेल्या सर्व टीडीआर प्रकरणांची सखोल चौकशी करावी, अशीही मागणी करण्यात आली आहे.
“पुणे महानगरपालिकेमध्ये शासकीय जमीन, एफएसआय आणि टीडीआर प्रकरणांमध्ये मोठ्या प्रमाणावर गैरव्यवहार झाले आहेत. या सर्व प्रकरणांची निष्पक्ष चौकशी करून दोषींवर तात्काळ फौजदारी कारवाई झाली नाही तर भ्रष्टाचाराविरोधातील आंदोलन अधिक तीव्र करण्यात येईल,” असा इशारा आंदोलनकर्ते किशोर कांबळे, सागर ढावारे, संजय साळवी, adv आकाश साबळे, adv कपिल शिवशरण, मिलिंद राजहंस, आनंद राजहंस,विरेश हिरेमठ, दीपा कांबळे आणि आकाश नागटिळे यांनी दिला आहे.

The post बनावट कागदपत्रे तयार करून शासकीय जमिनींचा गैरवापर; PMC विरोधात अन्नत्याग सत्याग्रह” appeared first on Grahak Jagruti News .

पुरंदर तालुक्यातील सासवड परिसरातील जनहितार्थ मल्टी स्पेशलिटी हॉस्पिटलचे डॉ शिवतारे यांच्या शैक्षणिक पात्रता व अतिदक्षता विभाग (ICU) चालविणाऱ्या डॉक्टरांच्या पात्रतेवरही प्रश्न उपस्थित करण्यात आले होते. संबंधित ठिकाणी BHMS व BAMS पदवीधारक डॉक्टरांकडून ICU व्यवस्थापन केले जात असल्याचा आरोप करत त्यांनी संबंधित डॉक्टरांकडे आवश्यक PGDEMS किंवा तत्सम आपत्कालीन वैद्यकीय पात्रता आहे का याची चौकशी करण्याची मागणी केली होती. अशी तक्रार ग्राहक हक्क संघर्ष समितीचे अध्यक्ष महेश राऊत यांनी अवैध हॉस्पिटलविरोधातील तक्रारीनंतर कारवाईऐवजी तक्रारदारालाच लक्ष्य केल्याचा आरोप करण्यात आला…

पुरंदर तालुक्यातील सासवड-बारामती परिसरातील अवैध रुग्णालयांविरोधात सातत्याने तक्रारी दाखल करणाऱ्या ग्राहक हक्क संघर्ष समितीचे पुणे जिल्हा अध्यक्ष महेश राऊत यांच्यावर सासवड पोलीस ठाण्यात खोटे गुन्हे दाखल करण्यात आल्याचा आरोप होत असून या प्रकारामुळे परिसरात मोठी खळबळ उडाली आहे.
राऊत यांनी सासवड परिसरातील जनहितार्थ मल्टी स्पेशलिटी हॉस्पिटलचे डॉ. शिवतारे यांच्यासह काही खासगी रुग्णालयांमध्ये सुरू असलेल्या कथित अनियमितता आणि बेकायदेशीर कारभाराविरोधात आरोग्य विभाग, शल्यचिकित्सक कार्यालय तसेच पोलिसांकडे तक्रारी केल्या होत्या. या तक्रारींमुळेच सासवड पोलीस ठाण्यातील काही अधिकाऱ्यांच्या सांगण्यावरून आपल्यावर खोटे गुन्हे दाखल करण्यात आले असल्याचा गंभीर आरोप राऊत यांनी केला आहे.
ग्राहक हक्क संघर्ष समितीच्या वतीने राऊत यांनी सासवड शहरातील अनेक खासगी रुग्णालयांविरोधात निवेदन देत गंभीर मुद्दे उपस्थित केले होते. अनेक रुग्णालयांकडे आवश्यक ना-हरकत दाखले (NOC) नसणे, रुग्णवाहिका व वाहनांसाठी पुरेशी पार्किंग व्यवस्था नसणे, अग्निशमन यंत्रणा अपुरी असणे, काही ठिकाणी लिफ्टची सुविधा नसणे अशा अनेक त्रुटी त्यांनी निदर्शनास आणून दिल्या होत्या.

तसेच काही रुग्णालयांमधील अतिदक्षता विभाग (ICU) चालविणाऱ्या डॉक्टरांच्या पात्रतेवरही प्रश्न उपस्थित करण्यात आले होते. काही ठिकाणी BHMS व BAMS पदवीधारक डॉक्टरांकडून ICU व्यवस्थापन केले जात असल्याचा आरोप करत त्यांनी संबंधित डॉक्टरांकडे आवश्यक PGDEMS किंवा तत्सम आपत्कालीन वैद्यकीय पात्रता आहे का याची चौकशी करण्याची मागणी केली होती.
याशिवाय अनेक रुग्णालयांमध्ये प्रशिक्षित परिचारिकांऐवजी दहावी-बारावी उत्तीर्ण महिलांकडून काम करून घेतले जात असल्याचा आरोपही त्यांनी केला. रुग्णालयातून निघणाऱ्या वैद्यकीय कचऱ्याची योग्य विल्हेवाट लावली जाते का, याचीही तपासणी व्हावी अशी मागणी निवेदनाद्वारे करण्यात आली होती.
दरम्यान, जिल्हा शल्यचिकित्सक पुणे यांनी या संदर्भात ११ सप्टेंबर रोजी जावक क्रमांक १०८०५/०७ तसेच जा.क्र. जिरुपु/आस्था/चौकशी १२००/२०५/२०२६ या पत्रांद्वारे ग्रामीण रुग्णालय सासवड प्रशासनाला चौकशी करण्याचे निर्देश दिले होते. मात्र, या पत्रांवर आजपर्यंत कोणतीही ठोस कारवाई करण्यात आलेली नसल्याचा आरोप करण्यात येत आहे.
सासवड-जेजुरी परिसरातील सर्व मान्यताप्राप्त ICU असलेल्या खासगी रुग्णालयांची सखोल चौकशी करून नियमबाह्य आढळणाऱ्यांवर कारवाई करावी, अशी मागणी राऊत यांनी पुन्हा एकदा केली आहे. अन्यथा या प्रकरणी तीव्र आंदोलन छेडण्याचा इशाराही त्यांनी दिला आहे.
या संपूर्ण प्रकरणामुळे सासवड व पुरंदर तालुक्यात आरोग्य व्यवस्था, खासगी रुग्णालयांचे परवाने आणि पोलिसांची भूमिका यावर प्रश्नचिन्ह उपस्थित होत असून नागरिकांमध्ये मोठी चर्चा रंगली आहे.

तक्रारीनंतर प्रशासनाने चौकशी करून आवश्यक ती कारवाई करावी, अशी अपेक्षा असताना तक्रारदार महेश राऊत यांच्याविरुद्धच सासवड पोलीस ठाण्यात गुन्हा दाखल झाल्याने प्रश्नचिन्ह निर्माण झाले आहे.
तक्रारीच्या संदर्भात डॉक्टरांना धमकी देत पाच लाख रुपयांची मागणी केल्याचा आरोप करत हा गुन्हा दाखल करण्यात आल्याचे सांगितले जात आहे. मात्र, महेश राऊत यांच्यावर करण्यात आलेले आरोप हे सूडभावनेतून आणि तक्रार दडपण्याच्या उद्देशाने करण्यात आले असल्याचा आरोप त्यांच्या समर्थकांकडून केला जात आहे.
“जर एखाद्या हॉस्पिटलबाबत प्रशासनाकडे नियमांनुसार तक्रार दाखल केली असेल, तर त्यावर प्रशासनाने चौकशी करून कायदेशीर कारवाई करणे अपेक्षित आहे. मात्र तक्रारदारावरच गुन्हा दाखल झाल्याने हा प्रकार संशयास्पद असल्याची चर्चा नागरिकांमध्ये सुरू आहे,” असे मत स्थानिक नागरिक व्यक्त करत आहेत.
या प्रकरणामुळे अवैध हॉस्पिटलविरोधात आवाज उठवणाऱ्यांना लक्ष्य केले जात आहे का? असा सवाल उपस्थित होत असून या संपूर्ण प्रकरणाची निष्पक्ष चौकशी व्हावी, अशी मागणी होत आहे.

The post “चोराला सोडून संन्याशाला फाशी! अवैध हॉस्पिटल विरोधात आवाज उठवणाऱ्या राऊतांवरच गुन्हा” appeared first on Grahak Jagruti News .

विश्रामबाग पोलीस ठाण्याच्या तपास पथकाने घरफोडी प्रकरणाचा छडा लावत उत्तर प्रदेशमधील एका कुख्यात गँगस्टरला अटक करत तब्बल ६२ लाख रुपयांच्या सोन्या-चांदीच्या दागिन्यांसह मुद्देमाल जप्त केला आहे. पुणे शहरातील विविध भागात झालेल्या घरफोड्यांचा उलगडा या कारवाईमुळे झाला आहे.

विश्रामबाग पोलीस ठाण्यात गुन्हा क्रमांक ११/२०२६ भारतीय न्याय संहिता कलम ३०५ (अ) व ३३१ (३) अन्वये अज्ञात आरोपींविरोधात घरफोडीचा गुन्हा दाखल करण्यात आला होता. फिर्यादी घरात नसताना आरोपींनी घराचा दरवाजा तोडून चोरी केल्याची घटना घडली होती.
या गुन्ह्याचा तपास करण्याचे आदेश वरिष्ठ पोलीस निरीक्षक प्रदीप कसबे यांनी तपास पथक प्रभारी सहायक पोलीस निरीक्षक राजेश उसगावकर यांना दिले. त्यानुसार तपास पथकाने घटनास्थळासह पुणे शहरातील विविध भागातील सीसीटीव्ही फुटेज तपासण्यास सुरुवात केली.
तपासादरम्यान पोलीस अंमलदार आशिष खरात व अनिस शेख यांनी सीसीटीव्हीच्या आधारे संशयित आरोपींचा मागोवा घेतला. आरोपी चोरी केल्यानंतर पुणे रेल्वे स्टेशन परिसरातील एका लॉजमध्ये थांबून परराज्यात पळून गेल्याचे निष्पन्न झाले.
यानंतर तपास पथकाने गुप्तपणे पाळत ठेवली. दरम्यान, एक महिन्यानंतर गुप्त माहितीदारामार्फत संशयित आरोपी पुन्हा घरफोडी करण्याच्या उद्देशाने ओंकारेश्वर मंदिर परिसरात आले असल्याची माहिती पोलिसांना मिळाली. खात्री झाल्यानंतर पोलिसांनी सापळा रचून २३ फेब्रुवारी २०२६ रोजी दोन्ही आरोपींना चारही बाजूंनी घेरून ताब्यात घेतले.

अटक केलेल्या आरोपींची नावे
आकाश सुभाष (वय २३) – सध्या सुंदरनगरी, दिल्ली; मूळ राहणार मेरठ, उत्तर प्रदेश
जितेंद्र चर्तुवेदी (वय ३२) – सुंदरनगरी, दिल्ली
चौकशीत आरोपींनी चोरीची कबुली दिली. त्यांनी चोरी केलेले दागिने पुणे रेल्वे स्टेशन परिसरातील लॉजमध्ये लपवून ठेवल्याचे सांगितले. पोलिसांनी लॉजवर छापा टाकून ३२ तोळे सोने व १२५ ग्रॅम चांदी जप्त केली.
पुढील तपासात आरोपींनी जानेवारी महिन्यात विश्रामबागसह पुण्यातील इतर तीन ठिकाणी घरफोड्या केल्याची कबुली दिली. न्यायालयात हजर केले असता त्यांना ६ मार्च २०२६ पर्यंत पोलीस कोठडी सुनावण्यात आली.

तपासादरम्यान मुख्य आरोपी आकाश सुभाष हा उत्तर प्रदेशातील ‘सनी गँग’शी संबंधित असून त्याच्यावर गाजियाबाद येथे खून, खुनाचा प्रयत्न व गँगस्टर अॅक्ट अंतर्गत गंभीर गुन्हे दाखल असल्याचे उघड झाले.
पोलिसांनी दिल्ली व उत्तर प्रदेश येथे जाऊन स्थानिक पोलिसांच्या मदतीने चोरीतील मुद्देमाल हस्तगत केला. आरोपींनी पुणे शहरात एकूण ५ ठिकाणी दिवस व रात्री घरफोड्या केल्याचे तपासात समोर आले.
या कारवाईत विश्रामबाग, समर्थ, खडक आणि भोसरी पोलीस ठाण्यांतील गुन्ह्यांमधील एकूण ६२,००,८१० रुपयांचा मुद्देमाल जप्त करण्यात आला आहे.

ही कारवाई पोलीस आयुक्त अमितेश कुमार, सह पोलीस आयुक्त रंजनकुमार शर्मा, अप्पर पोलीस आयुक्त राजेश बनसोडे, पोलीस उप आयुक्त हृषीकेश रावले यांच्या मार्गदर्शनाखाली करण्यात आली. तपास पथक प्रभारी राजेश उसगावकर यांच्यासह पोलिसांच्या टीमने ही यशस्वी कारवाई केली.

The post पुण्यात घरफोड्यांचा थरार उघड; उत्तर प्रदेशचा गँगस्टर विश्रामबाग पोलिसांच्या तावडीत, ६२ लाखांचे दागिने जप्त” appeared first on Grahak Jagruti News .